Президент инаугурацияси бўлиб ўтди

Қўшма мажлисни Марказий сайлов комиссияси (кейинги ўринларда – МСК) Раиси Мирза-Улуғбек Абдусаломов очди. У юртимизда 2016 йил 4 декабрь куни бўлиб ўтган Президент сайлови якунлари бўйича сайловчиларнинг 88,61 фоиз овози билан Тадбиркорлар ва ишбилармонлар ҳаракати - Ўзбекистон Либерал-демократик партиясидан кўрсатилган номзод Шавкат Миромонович Мирзиёев Ўзбекистон Республикаси Президенти этиб сайланганлигини таъкидлади. Шунингдек,  МСКнинг 2016 йил 9 декабрь куни бўлиб ўтган мажлисида сайлов натижалари кўриб чиқилиб, Ўзбекистон Республикаси Президенти лавозимига Шавкат Миромонович Мирзиёев сайлангани тўғрисида қарор қабул қилинганини қайд этди.

МСК Раиси залда ҳозир бўлганлар ва сайловчилар номидан Шавкат Мирзиёевни Ўзбекистон Республикаси Президенти этиб сайлангани билан самимий табриклаб, унга Ўзбекистон Республикаси Президенти гувоҳномаси ва Ўзбекистон Республикаси Марказий сайлов комиссиясининг шаҳодатномасини топширди.   

Конституциянинг  92-моддасига мувофиқ Шавкат Мирзиёев қасамёд қилди: "Ўзбекистон халқига садоқат билан хизмат қилишга, Республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Ўзбекистон Республикаси Президенти зиммасига юклатилган вазифаларни виждонан бажаришга тантанали қасамёд қиламан".

Қасамёддан сўнг Шавкат Мирзиёев нутқ сўзлади.

Мавзуга оид материаллар:

Сайлов кампанияси фаоллашмоқда

Ўзбекистон Республикаси Президенти сайлови 2016 йил 4 декабрда бўлиб ўтади

Президентнинг вазифалари Бош вазир Ш.Мирзиёевга вақтинча юкланди