НҲҲ лойиҳалари: солиқ маслаҳатчилари учун жарималар

I. 21.09.2006 йилдаги ЎРҚ–55-сон “Солиқ маслаҳати тўғрисида”ги Қонунда солиқ маслаҳатчилари ташкилоти раҳбари фуқаролик жавобгарлиги суғурта полисисиз солиқ маслаҳати бўйича хизматлар кўрсатганлик учун шахсан жавобгарлигини кўрсатиб ўтиш таклиф этилмоқда.

Мижоз (ишонч билдирувчи) талабига кўра фуқаролик жавобгарлиги полиси ҳар бир хизмат кўрсатиш тўғрисидаги шартнома бўйича беш йил муддатгача алоҳида олиниши мумкин.   

Шунингдек, солиқ маслаҳатчилари ташкилотларининг мажбуриятлари жумласига қуйидагиларни киритиш таклиф этилмоқда:

• ваколатли давлат органи томонидан ўрнатилган тартиб бўйича ўз фаолияти ҳақида маълумот тақдим этиш;
• амалдаги суғурта шартномаси бўйича суғурта ҳодисаси содир бўлганда янги фуқаролик жавобгарлиги суғурта полисини олиш;
• солиқ маслаҳати стандартларига асосан солиқ маслаҳатчилари иши сифатини ички назорат қилиш қоидаларини ўрнатиш ва унга риоя қилиш.

Бундан ташқари, солиқ маслаҳатчиси хулосаси атамасини киритиш назарда тутилмоқда. Бу солиқ маслаҳатчилари ташкилотининг солиқ ва бошқа мажбурий тўловларни ҳисоблаб чиқариш, тўлаш, солиқ солиш билан боғлиқ объектларни аниқлаш ва ҳисобини юритиш, шунингдек қонунчилик талабларига мувофиқ солиқ ҳисоботи тузишнинг ишончлилиги масалалари бўйича ёзма шаклда ифодаланган фикрларини сақлайдиган ҳужжатдир.

Лойиҳага кўра хулосани бериш тартиби қуйидагича:

• солиқ маслаҳати бўйича ҳисобот асосида тузилади;
• солиқ маслаҳати берган солиқ маслаҳатчиси томонидан ҳар бир варағи имзоланади, солиқ маслаҳатчилари ташкилоти раҳбари томонидан тасдиқланади ва шу ташкилотнинг муҳри туширилади (агар бўлса).

II. Маъмурий жавобгарлик тўғрисидаги кодексга солиқ маслаҳатчилари ташкилотларининг жавобгарлигини кўзда тутадиган иккита моддани киритиш таклиф қилинди.

Лойиҳа муҳокама босқичида бўлиб, у ўзгартирилиши, қўшимчалар киритилиши ёки бекор қилиниши мумкин.


 

Олег ЗАМАНОВ,
экспертимиз.