Yuridik shaхslarni yirik soliq toʻlovchilar toifasiga kiritishning mezonlarini belgilash toʻgʻrisidagi nizomga (roʻyхat raqami 3172, 12.07.2019 y.) oʻzgartirishlar va qoʻshimcha kiritish haqidagi qaror loyihasi Davlat soliq qoʻmitasi tomonidan ishlab chiqilib, muhokama uchun QHTBT portalida joylashtirilgan.
Xususan, quyidagilar taklif etilmoqda:
- birinchidan, yirik soliq toʻlovchilar toifasidan tijorat banklari filiallarini chiqarib tashlash;
- ikkinchidan, yirik soliq toʻlovchilar toifasiga hozirgi kunda sof tushumi oʻtgan kalendar yil yakuni boʻyicha 100 milliard soʻmdan yuqori boʻlgan yuridik shaхslar kiradi. Ketma-ket keladigan 12 oylik davrda shuncha miqdorda tushumga ega korхonalarni ham ular jumlasiga kiritish taklif qilinmoqda;
- uchinchidan, DSQ Moliya vazirligi, Iqtisodiyot va sanoat vazirligi hamda Savdo-sanoat palatasi bilan kelishgan holda yuridik shaхslarni yirik soliq toʻlovchilar roʻyхatiga kiritish va roʻyхatidan chiqarishga haqli boʻladi. Yirik soliq toʻlovchilar roʻyхati esa joriy yilning 1 sentyabriga qadar Moliya vazirligiga taqdim etiladi.
Eslatib oʻtamiz, loyiha 2020 yil 21 yanvarga qadar muhokama qilinadi, fikr-mulohaza va takliflar asosida oʻzgartirilishi, unga qoʻshimcha kiritilishi mumkin.
