Бу Президентнинг 17.08.2020 йилдаги “Хоразм вилоятида тадбиркорликни ривожлантириш ва унинг инвестициявий жозибадорлигини ошириш чора-тадбирлари тўғрисида” қарорида назарда тутилган.
“Ҳазорасп” ЭИЗ қишлоқ хўжалигида фойдаланилмаётган бўш турган ер участкалари ҳисобидан кенгайтирилади. Кенгайтирилган ҳудудларда замонавий рақобатбардош, импорт ўрнини босувчи, экспортга йўналтирилган тайёр саноат маҳсулотларини ишлаб чиқаришга мўлжалланган ишлаб чиқариш қувватлари босқичма-босқич жойлаштирилади.
Тикланиш ва тараққиёт жамғармаси маблағлари ҳисобидан “Khorezm Invest Project” МЧЖ инвестиция компаниясининг кенгайтирилган ҳудудларида муҳандислик-коммуникация инфратузилмаси объектларини қуриш 10 йил муддатга 2,5% ставкасида $13 млн эквивалентида маблағлар ажратилади.
“NBU Invest Group” МЧЖ, “PSB Capital” МЧЖ ҳамда “Asaka Capital Invest” МЧЖ “Khorezm Invest Project” МЧЖнинг таъсисчилари ҳисобланади. Устав фонди дастлаб $30 млн эквиваленти миқдорини ташкил этади, кейинчалик эса $100 млн эквиваленти миқдоригача кўпайтирилади. Компаниянинг асосий вазифалари - Хоразм вилоятидаги инвестиция лойиҳаларининг ТИАни ишлаб чиқиш, лойиҳаларни амалга оширишга маҳаллий ва хорижий инвесторларни жалб қилиш.
Хоразм вилояти ҳокимлиги ҳузурида юридик шахс ташкил этмасдан Инфратузилма жамғармаси ташкил этилади, унинг маблағлари кенгайтирилган ҳудудларда инфратузилма қурилишини молиялаштиришга йўналтирилади.
Шунингдек, ҳужжат билан:
- Хоразм вилоятида 2020-2022 йилларда амалга ошириладиган умумий қиймати 2,2 трлн сўмлик 84 та инвестиция лойиҳасининг манзилли рўйхати;
- Хоразм вилоятида амалга ошириладиган умумий қиймати $516,8 млн бўлган 26 та истиқболли инвестиция лойиҳасининг рўйхати тасдиқланди. 2021 йил 1 апрелга қадар улар билан бир вақтда ҳар бир туманда қўшимча янги саноат ишлаб чиқариш лойиҳалари ишга туширилади.
“Ҳазорасп” ЭИЗга бириктирилган Ўзбекистоннинг хорижий мамлакатлардаги дипломатик ваколатхоналари белгиланди. Ўзбекистоннинг Австрия, Бельгия, Буюк Британия, Германия, Греция, Франция, Испания, Италия, Латвия, Польша ва Туркия давлатларидаги элчихоналарига тўғридан-тўғри хорижий инвестициялар ҳисобидан ЭИЗда янги инвестиция лойиҳаларини жойлаштириш чораларини кўриш топширилди.
2020 йил 1 сентябрдан бошлаб экспорт қатновларда Хоразм вилояти ва Тошкент шаҳри ўртасида экспорт қилувчиларга темир йўл юк қатнови тарифларига 50% чегирма жорий этилади.
Эльмира Сиразиева.
