Vazirlar Mahkamasi 17.09.2021 yildagi “Qishloq хoʻjaligi va oziq-ovqat mahsulotlari yoʻqotishlarini qisqartirishga doir qoʻshimcha chora-tadbirlar toʻgʻrisida”gi 574-son qarorni qabul qildi.
Qishloq хoʻjaligi vazirligi huzuridagi “Agrosanoatni raqamlashtirish markazi”da Elektron agrosanoat bozori portali tashkil etiladi, u qishloq хoʻjaligi va asosiy turdagi oziq-ovqat mahsulotlari qoldiqlari toʻgʻrisida ma’lumotni saqlaydi, ularning narхini kuzatib borish hamda tovarlarni onlayn sotish imkonini beradi.
Quyidagilar elektron portalning asosiy faoliyat yoʻnalishlari hisoblanadi:
- ishlab chiqaruvchilar, ulgurji va chakana savdo tashkilotlari oʻrtasida kontraktatsiya shartnomalari toʻgʻrisidagi ma’lumotlarning real vaqt rejimida monitoringini yuritish;
- asosiy turdagi qishloq хoʻjaligi va oziq-ovqat mahsulotlari narхlari boʻyicha ma’lumotlarni toʻplash va tahlil qilish;
- ichki bozorni asosiy turdagi oziq-ovqat mahsulotlari bilan ta’minlash darajasini doimiy baholash;
- хoʻjalik yurituvchi sub’yektlar oʻrtasida onlayn rejimda kooperatsiya aloqalarini yoʻlga qoʻyish va elektron savdolarni tashkil etish.
Elektron portal 2021 yil 1 oktyabrdan 1 dekabrga qadar test rejimida ishlaydi va 2022 yil 1 yanvardan boshlab toʻliq ishga tushiriladi.
Shu bilan bir qatorda, shunday tartib oʻrnatilmoqdaki, unga muvofiq “Ye-AUKSION” elektron savdo platformasi orqali ajratilgan davlat mulki hisoblangan yer uchastkalari va bino-inshootlar qiymati tadbirkorlik sub’yekti tomonidan savdo oʻtkazilgan sanadan boshlab bir yil davomida teng ulushlarda boʻlib-boʻlib toʻlanadi.
Hujjat Qonun hujjatlari ma’lumotlari milliy bazasida e’lon qilingan va 18.09.2021 yildan kuchga kirdi.
Lola Abduazimova.