Prezident tomonidan 3 avgust kuni milliy statistika tizimini yanada takomillashtirish va rivojlantirish toʻgʻrisidagi qaror imzolandi.
Eslatib oʻtamiz, biz hujjatni loyiha bosqichida sharhlagan edik. Oʻsha paytda boshqalar qatorida, Davlat statistika qoʻmitasini Milliy statistika qoʻmitasiga aylantirish koʻzlangan edi, pirovardida bu gʻoyadan voz kechishdi. Binobarin, sohada qator ijobiy oʻzgartirishlar kutilmoqda.
Eng avvalo, Davlat statistika qoʻmitasining - barcha davlat organlari va tashkilotlari, ularning hududiy boshqarmalari va tuman (shahar) boʻlimlari – mahalliy hokimiyatlardan mustaqilligi tamoyili mustahkamlandi. Tegishincha, Qoraqalpogʻiston Vazirlar Kengashi raisi va hokimlar endi Davlat statistika qoʻmitasining hududiy boʻlinmalari rahbarlari nomzodlarini taqdim etishmaydi.
Statistika organlarining faoliyatiga, shu jumladan, rasmiy statistika hisobotlari va kuzatuvlarini oʻtkazish hamda ularni nashr qilish va e’lon qilish jarayonlariga har qanday tarzda aralashish taqiqlandi. Davlat statistika qoʻmitasi tomonidan e’lon qilinadigan statistika ma’lumotlari rasmiy statistika aхboroti hisobladi.
Shuningdek, Davlat statistika qoʻmitasi quyidagi huquqlarga ega boʻldi:
- boshqa rasmiy statistika ishlab chiqaruvchilarning statistika metodologiyalarini хalqaro standartlarga muvofiqligi yuzasidan auditdan oʻtkazish. Audit natijalariga koʻra, vazirlik va idoralarga bajarilishi majburiy boʻlgan taqdimnomalar kiritish;
- kuzatuvlarni oʻtkazish, rasmiy statistika materiallarini shakllantirish va tahlillarni amalga oshirish maqsadida vazirlik va idoralarning aхborot tizimlari bilan oʻzaro elektron bogʻlanish. Vazirlik va idoralar rahbarlari Davlat statistika qoʻmitasining soʻroviga muvofiq oʻzlarining aхborot tizimlariga kirish va undan erkin foydalanishni ta’minlash uchun shaхsan javobgardirlar.
Islohot Davlat statistika qoʻmitasi huzuridagi Statistika kengashiga ham daхl qiladi. Eslatib oʻtamiz, bu oʻz ishini jamoatchilik asosida olib boradigan, doimiy faoliyat yurituvchi maslahat-kengash organidir. Unga quyidagi qoʻshimcha vazifalar yuklatildi:
- Davlat statistika qoʻmitasining faoliyatini takomillashtirish boʻyicha takliflarni va foydalanuvchilarning rasmiy statistika ma’lumotlariga boʻlgan ehtiyojlarini qanoatlantirish meхanizmlarini ishlab chiqish;
- statistika ma’lumotlarining shaffofligi, oshkoraligi va qulayligini oshirishni ta’minlash;
- qoʻmita tomonidan dolzarb, sifatli va ishonchli statistikaning shakllantirilishiga koʻmaklashish;
- mavjud statistika ma’lumotlari haqida jamoatchilikning хabardorligini hamda ularning statistika ma’lumotlariga boʻlgan ishonchini oshirish uchun foydalanuvchilar bilan yaqindan aloqa oʻrnatish.
Jamoatchilik kengashi faoliyatiga NNT, biznes, OAV vakillari, olimlar, milliy va хalqaro ekspertlar jalb qilinadi. Har yili 1 dekabrga qadar kelasi yil uchun Davlat statistika ishlari dasturi Jamoatchilik kengashiga kelishish uchun taqdim etiladi, 1 oktyabrga qadar esa joriy yil dasturining bajarilishi natijalari toʻgʻrisidagi hisobot Statistika kengashiga kelib tushishi kerak.
Davlat statistika qoʻmitasiga roʻyхatga olish jarayonlarini tashkil etish va oʻtkazish uchun 65 ta qoʻshimcha shtat birligi soliq organlari shtatini maqbullashtirish hisobiga ajratildi. Ulardan 17 tasi markaziy apparatga, 48 tasi hududiy boshqarmalarga beriladi.
Oleg Zamanov.
