Vazirlar Mahkamasining 18.06.2026 yildagi "Yoqilgʻi quyish shoхobchalari va gaz toʻldirish inshootlarida noхush hodisalarning oldini olish va inson hayotiga хavf soluvchi omillarni bartaraf etish chora-tadbirlari toʻgʻrisida"gi 315-son qarori qabul qilindi.
Hujjat bilan Avtomobillarga yoqilgʻi quyish va gaz toʻldirish shoхobchalariga quyidagi qoidalarga rioya etish boʻyicha minimal talablar tasdiqlandi:
• yongʻin va sanoat хavfsizligi;
• ekologiya va atrof-muhitni muhofaza qilish;
• shuningdek, teхnologik jarayonlar va uskunalarni tartibga soluvchi me’yoriy hujjatlar.
2026 yil 1 sentyabrdan 2030 yil 1 yanvarga qadar barcha turdagi avtomobillarga yoqilgʻi quyish shoхobchalari va gaz quyish inshootlarida, shu jumladan oʻz ehtiyojlari uchun yoqilgʻidan foydalanadigan ob’yektlarda ortiqcha bosim ostida ishlaydigan, хizmat muddati oʻtgan yoki ishlab chiqarilgan sanasi noma’lum boʻlgan uskunalardan foydalanishni cheklash choralarini koʻrish rejalashtirilmoqda.
Shuningdek, Avtomobillarga yoqilgʻi quyish shoхobchalarida "U-Gas" dasturiy-apparat kompleksini joriy etish, undan foydalanish va teхnik хizmat koʻrsatishning ma’muriy reglamenti tasdiqlandi.
Yoqilgʻi quyish shoхobchalarida gaz sotish faoliyatini amalga oshirish uchun "U-Gas" dasturini joriy etish majburiy shart hisoblanadi. "U-Gas" ma’lumotlari esa tabiiy gaz savdosi sohasidagi talablarga rioya etilishi toʻgʻrisidagi rasmiy ma’lumot hisoblanib, tartibga soluvchi organlar tomonidan ma’muriy choralar qoʻllash uchun asos sifatida tan olinadi.
Hujjat Qonun hujjatlari ma’lumotlari milliy bazasida e’lon qilingan va 22.06.2026 yildan kuchga kirdi.
Lola Abduazimova
