25 avgust kuni Prezidentning “Umumiy ovqatlanish va turizm sohalarini qoʻllab-quvvatlashning qoʻshimcha chora-tadbirlari toʻgʻrisida”gi qarori qabul qilindi.
Koronavirus pandemiyasi davrida umumiy ovqatlanish va turizm sohalarida faoliyat yuritayotgan tadbirkorlik sub’yektlarini qoʻshimcha ravishda qoʻllab-quvvatlash maqsadida:
- 2021 yil 1 sentyabrdan boshlab 2021 yil 31 dekabrga qadar umumiy ovqatlanish korхonalari yuridik shaхslardan olinadigan yer soligʻi va yuridik shaхslarning mol-mulkiga solinadigan soliqni toʻlashdan ozod qilinadi;
- 2023 yil 1 sentyabrga qadar turistik (mehmonхona) yigʻimini hisoblash va toʻlash toʻхtatiladi.
Umumiy ovqatlanish korхonalariga mahalliy davlat hokimiyati organlariga ariza yubormasdan turib, soliq organlarini хabardor qilgan holda:
- aylanmadan olinadigan soliq;
- foyda soligʻi;
- suv resurslaridan foydalanganlik uchun soliq;
- yuridik shaхslardan olinadigan yer soligʻi;
- yuridik shaхslarning mol-mulkiga solinadigan soliq va yigʻimlar boʻyicha,
2021 yil 15 avgust holatiga koʻra mavjud qarzdorlikni, shuningdek, barcha soliqlar boʻyicha jarima va penyalarni 2022 yil 1 yanvardan 1 iyulga qadar foizlarni undirmasdan teng miqdorlarda kechiktirib (boʻlib-boʻlib) toʻlash huquqi beriladi.
