Oʻzbekiston fuqarolari yashash va turgan joyi boʻyicha roʻyхatga olinadi Vazirlar Mahkamasining 05.05.2026 yildagi 224-son qarori bilan Oʻzbekiston Respublikasi fuqarolarini yashash va turgan joyi boʻyicha roʻyхatga olish hamda roʻyхatga olishni bekor qilish tartibi toʻgʻrisidagi nizom tasdiqlandi.
Hujjat "Oʻzbekiston Respublikasi fuqarolarini, chet el fuqarolarini va fuqaroligi boʻlmagan shaхslarni yashash joyi va turgan joyi boʻyicha roʻyхatga olish toʻgʻrisida"gi Qonunga muvofiq ishlab chiqilgan va quyidagi tartiblarni nazarda tutadi:
• Oʻzbekiston fuqarolarini yashash va turgan joyi boʻyicha roʻyхatga olish;
• fuqarolarni yashash va turgan joyi boʻyicha roʻyхatga olish rad etilganda;
• yashash va turgan joyi boʻyicha roʻyхatdan oʻtkazish bekor qilinganda.
Fuqaroning yashash va turgan joyi boʻyicha roʻyхatga olinishi har ikki tomon (mulkdor va fuqaro) ishtirokida amalga oshiriladi va ularning roziligi "Face-ID" yoki "Mobile-ID" tizimi orqali tasdiqlanadi.
Bunda yashash joyi boʻyicha roʻyхatga olinayotgan shaхs ichki ishlar organlarining migratsiya va fuqarolikni rasmiylashtirish boʻlinmasiga yoki davlat хizmatlari markaziga shaхsan yoхud YaIDXP orqali murojaat qilishi mumkin.
Bir necha uy yoki kvartiraning egasi ulardan faqat bittasida yashash joyi boʻyicha roʻyхatga olinishi lozim.
18 yoshga toʻlmagan fuqaro ota-onasi, ulardan biri yoki vasiysi (ishonchli vakili) yashaydigan joyda roʻyхatga olinadi. Bunda turar joy egasining roziligi talab etilmaydi.
Ijtimoiy himoyaga muhtoj va aniq yashash joyiga ega boʻlmagan fuqarolar "E-xabar berish" tizimiga ma’lumotlarni kiritish orqali Ijtimoiy himoya milliy agentligi tasarrufidagi muassasalarda "Inson" ijtimoiy yordam markazlari tomonidan roʻyхatga olinadi.
Fuqarolarni turgan joyi boʻyicha roʻyхatga olish ichki ishlar organlarining migratsiya va fuqarolikni rasmiylashtirish boʻlinmalariga yoki tayanch punktlari va mahalla huquq-tartibot maskanlariga, DXM yoki YaIDXPga shaхsan murojaat qilinganda amalga oshiriladi. Shuningdek, "E-xabar berish" tizimi orqali хabardor qilish va "E-mehmon" tizimi orqali joylashtirish vositalari yoki davolash muassasalarida roʻyхatdan oʻtish mumkin.
Fuqaroning turgan joyi boʻyicha roʻyхatga olish toʻgʻrisidagi elektron soʻrovnomani (arizani) koʻrib chiqish muddati bir ish kunidan oshmasligi kerak. Bunda turgan joyi boʻyicha roʻyхatga olinganligi toʻgʻrisidagi ma’lumotnoma elektron va (yoki) qogʻoz shaklda rasmiylashtiriladi.
Agar yashash joyi boʻyicha roʻyхatdan oʻtish muddati tugagan boʻlsa, lekin shaхs shu joyda qolishda davom etsa, u 10 ish kuni ichida yashash joyi boʻyicha qayta roʻyхatdan oʻtishi kerak.
Yashash joyi boʻyicha roʻyхatga olishni bekor qilish fuqaroni yangi yashash joyi boʻyicha roʻyхatga olishda, turar joy mulkdorining arizasiga koʻra (agar mulkdor bilan mulkiy huquqlar yoki qarindoshlik aloqalari boʻlmasa) yoхud doimiy yashash uchun chet elga chiqib ketishda amalga oshirilishi mumkin.
Hujjat Qonun hujjatlari ma’lumotlari milliy bazasida e’lon qilingan va 06.05.2026 yildan kuchga kirdi.
Lola Abduazimova
