ҚҲТБТ порталида Солиқ кодексининг 356-моддаси иккинчи қисмига қўшимчалар киритишни кўзда тутувчи қонун лойиҳаси жойлаштирилди.
Таклиф этилаётган тузатишларга кўра, сайёҳлик фаолияти субъектлари учун ягона солиқ тўлови бўйича солиқ солиш базаси сайёҳлик хизматларини онлайн бронлаш ва сотиш бўйича дастурий маҳсулотлар ҳамда ахборот тизимларини жорий этишга йўналтирилган маблағлар суммасига мутаносиб равишда камаяди.
Лойиҳа Президентнинг 6.10.2017 йилдаги сайёҳликни қисқа ва ўрта муддатли истиқболда ривожлантириш бўйича давлат сиёсатини тўлиқлигича амалга ошириш масалалари бўйича йиғилиши якунларига кўра ишлаб чиқилган. Ўзгартиришлар тахминан келгуси йилнинг 1 январидан бошлаб амал қила бошлайди.
Маълумот учун: СКнинг 355-моддасига биноан ҳисоблаб чиқарилган ялпи тушум ЯСТ бўйича солиқ солинадиган база ҳисобланади. Қуйидагилар ЯСТ тўловчилари ҳисобланади:
- микрофирмалар ва кичик корхоналар, СКнинг 350-моддаси 2-қисмида кўрсатилганлардан ташқари;
- ходимлар сонидан қатъи назар:
– савдо ва умумий овқатланиш корхоналари;
– юридик шахслар лотереялар ташкил этиш бўйича фаолият доирасида;
- шерик (иштирокчи) – оддий ширкат ишларини юритиш зиммасига юклатилган якка тартибдаги тадбиркор (ишончли вакил).
Лойиҳа ўзгартирилиши, тўлдирилиши ёки рад этилиши мумкин.
Олег Заманов,
экспертимиз.