Вазирлар Маҳкамасининг 6.10.2018 йилдаги 803-сон қарори билан «Бухоро-Агро» ЭИЗ учун инвестиция лойиҳаларини танлаб олиш ҳамда қатнашчиларини рўйхатдан ўтказиш тартиби тасдиқланди.
«Бухоро-Агро» ЭИЗ Президентнинг 10.07.2018 йилдаги ПҚ-3843-сон қарорига биноан 30 йиллик фаолият муддати билан ташкил этилди. Унинг вазифалари, солиқ, божхона ва бошқа имтиёзлар, кредитлаш шартлари тўғрисида – бу ерда.
Инвестиция лойиҳалари қандай кўриб чиқилади
Инвестиция лойиҳаларини танлаб олиш бўйича ташкилий масалаларни ҳал этиш билан Бухоро вилояти ЭИЗ ва КСЗ Маъмурий кенгаши, шунингдек «Бухоро-Агро» ЭИЗ (кейинги ўринларда – ЭИЗ) дирекцияси шуғулланади. 5 млн АҚШ долларидан юқори қийматли инвестиция лойиҳалари ЭИЗ ва КСЗ маъмурий кенгашларининг фаолиятини мувофиқлаштириш бўйича Республика кенгаши билан келишилган ҳолда амалга оширилади.
Инвестор иштирок этиш учун ЭИЗ дирекциясига инвестиция буюртманомасини, шу жумладан электрон шаклда, зарур ҳужжатларни илова қилган ҳолда тақдим этади. Ҳужжатлар рўйхати, шунингдек буюртманомани кўриб чиқиш тартиби билан бу ерда танишиш мумкин.
Илова қилинадиган ҳужжатлардан бири таклиф этилаётган инвестиция лойиҳасининг бизнес-режаси ҳисобланади. Унда қуйидагилар акс эттирилган бўлиши керак:
- ишга қабул қилинаётган ходимлар тоифаси (коллеж битирувчилари; меҳнат биржаси томонидан йўналтирилган шахслар; бошқа ташкилотлар ишчилари; чет элдан жалб этилган мутахассислар) ҳамда ташкил этилаётган иш ўринлари сони;
- етиштириладиган ва қайта ишланадиган маҳсулот ҳажми ва табиий хусусияти;
- маҳсулотнинг мўлжалланаётган сотиш баҳоси ҳамда маҳсулотни ички ва ташқи бозорга етказиб бериш ҳажмлари;
- ижарага олинаётган ер участкасининг ўлчамлари, ишлаб чиқариш цехи, ускуна ва технологик линиялар, ёрдамчи биноларнинг дастлабки чизмаси;
- лойиҳанинг иқтисодий самарадорлиги кўрсаткичлари, молиявий ҳисоб-китоблар ва бошқалар.
Қуйидаги лойиҳаларга устунлик берилади:
- юқори ҳосилдорликка эга бўлган замонавий иссиқхона хўжаликларини, шу жумладан гидропоника технологияларини қўллаган ҳолда, кластер усули асосида ташкил этиш;
- барпо этилаётган иссиқхоналарда маҳсулотлар етиштиришнинг уруғ экишдан бошлаб маҳсулотни бозорга етказиб беришгача бўлган тўлиқ жараёнини ташкил этиш;
- иссиқхоналарни қуришда замонавий энергия тежовчи технологиялар ва энергиянинг муқобил манбаларидан фойдаланиш;
- экспортга йўналтириладиган маҳсулотлар етиштиришни режалаштириш;
- республика фуқароларини ишга жалб қилиш.
Инвесторларни рўйхатдан ўтказиш тартиби
Инвестиция лойиҳаси маъқуллангандан кейин Дирекция ва инвестор ўртасида белгиланган шаклдаги инвестиция киритиш тўғрисидаги шартнома (маъқуллаш баённомаси тасдиқлангандан кейин 5 иш куни ичида) тузилади.
Инвестор ЭИЗ ҳудудида жойлаштириш учун ташкил этиладиган ташкилотни белгиланган тартибда рўйхатдан ўтказиши ва Дирекцияга рўйхатдан ўтказилганлиги тўғрисидаги гувоҳнома нусхасини тақдим этиши лозим. Бундан ташқари, Дирекцияга ЭИЗ қатнашчиси сифатидан рўйхатдан ўтказиш учун тўлов тўланганлигини тасдиқловчи ҳужжат юборилади (тўлов миқдори Республика кенгаши томонидан белгиланади, таҳр.). Бундан кейин Дирекция 2 иш куни мобайнида ташкилотни рўйхатдан ўтказади ва қатнашчи гувоҳномасини беради.
Мазкур санадан бошлаб инвестиция киритиш тўғрисидаги шартнома кучга киради. Хўжалик юритувчи субъект ҳақидаги маълумотлар 1 иш куни ичида тегишли солиқ ва божхона органларига юборилади.
Ҳужжат Қонун ҳужжатлари маълумотлари миллий базасида эълон қилинган ва 6.10.2018 йилдан кучга кирди.
Ленара Хикматова.
