Вазирлар Маҳкамасининг 15.02.2019 йилдаги 136-сон қарори билан транспорт воситаларини мажбурий техник кўрикдан ўтказиш тартибининг такомиллаштирилиши муносабати билан Ҳукуматнинг айрим қарорларига тузатишлар киритилди.
Жисмоний шахсларга тегишли енгил автомобилларни тадбиркорлик субъектлари – юридик шахслар томонидан мажбурий техник кўрикдан ўтказиш санаси 2021 йил 1 январга кўчирилди. Вазирлар Маҳкамасининг 22.12.2017 йилдаги 1010-сон қарорига тегишли ўзгартиришлар киритилди. Шу тариқа, кўрсатилган санагача ушбу функцияни ИИВ Давлат йўл ҳаракати хавфсизлиги хизмати органлари бажарадилар.
Бироқ тадбиркорлик субъектлари жараёндан тўлиқ чиқариб ташланмади. Улар аввалгидек йўловчилар ташиш учун мўлжалланган ва (ҳайдовчи ўрнидан ташқари) ўтириш учун саккизтадан кўп бўлмаган ўриндиқларга эга М1 тоифадаги транспорт воситаларининг техник ҳолатини текширишлари мумкин. Батафсил тартиб – бу ерда. Эслатиб ўтамиз, 2018 йил 1 январдан бунга рухсат берилган. Бу борада ўзгартиришлар киритилмади.
Бунда транспорт воситаларининг техник ҳолатини баҳолаш учун мўлжалланган ишлаб чиқариш-техник база жойлаштириладиган хона ва майдонларга талаблар, шунингдек техник кўрик линияларининг ўлчамлари тасдиқланди. Тегишинча, ушбу фаолиятни амалга оширадиган барча тадбиркорлик субъектлари белгиланган талабларга жавоб беришлари керак. Улар Транспорт воситаларини мажбурий техник кўрикдан ўтказиш тартиби тўғрисидаги низомга иловалар кўринишида баён этилган. Улар билан бу ерда батафсил танишиб чиқиш мумкин.
Ҳужжат Қонун ҳужжатлари маълумотлари миллий базасида эълон қилинган ва 16.02.2019 йилдан кучга кирди.
Олег Заманов.
