Ўзбекистон Республикаси ва Буюк Люксембург Герцоглиги ўртасида 1997 йил 2 июлда имзоланган иккиёқлама солиқ солинишининг олдини олиш ҳамда даромад ва сармоя солиқларини тўлашдан бош тортишни бартараф қилиш тўғрисида Конвенцияга ўзгартиришлар киритиш тўғрисидаги баённома кучга кирди. Бу ҳақда Ўзбекистон ТИВ сайтида маълум қилинди.
Баённома 2017 йил сентябрь ойида Люксембург шаҳрида имзоланган.
Янги ҳужжат солиққа оид ахборотлар билан алмашишни халқаро стандартларга мос ҳолда олиб бориш ва икки томонлама солиққа тортиш тўғрисидаги шартнома шартларини суиистеъмол қилишнинг олдини олиш имконини беради. Бу солиққа тортиладиган базани йўқ қилиш ва фойдани солиққа тортишдан яширишга қарши курашиш бўйича Иқтисодий ҳамкорлик ва тараққиёт ташкилоти (ИҲТТ) томонидан ишлаб чиқилган ҳаракатлар режасининг асосий бандларидан бири ҳисобланади.
Баённоманинг 6-моддасига биноан ҳужжатнинг қоидалари 2020 йил 1 январдан тўланадиган солиқларга нисбатан қўлланила бошлайди.
