Президент Ўзбекистон Республикаси сув хўжалигини ривожлантиришнинг 2020–2030 йилларга мўлжалланган концепциясини тасдиқлади.
Ўзбекистонда бир йилда ўртача 51–53 млрд куб метр сувдан фойдаланилади, шу жумладан, 97,2%и – дарё ва сойлардан, 1,9%и – коллектор тармоқларидан, 0,9%и эса – ер ости манбаларидан. Фойдаланилаётган миқдор ажратилган сув олиш лимитига нисбатан 20%га қисқарган.
Минтақада сув ресурсларининг тақчиллиги кучаяётганини инобатга олган ҳолда қабул қилинган Концепцияда қуйидагилар назарда тутилган:
- суғориш тизимларининг фойдали иш коэффициентини 0,63 дан 0,73 гача ошириш;
- сув таъминоти паст даражада бўлган суғориладиган ер майдонларини 560 минг гектардан 190 минг гектаргача камайтириш;
- шўрланган суғориладиган ер майдонларини 226 минг гектарга камайтириш;
- Сув хўжалиги вазирлиги тизимидаги насос станцияларининг йиллик электр энергияси истеъмолини 25%га камайтириш;
- барча ирригация тизими объектларига «Smart Water» («Ақлли сув») сув ўлчаш ва назорат қилиш қурилмаларини ўрнатиб, сув ҳисобини юритишда рақамли технологияларни жорий этиш;
- 100 та йирик сув хўжалиги объектларида сувни бошқариш жараёнларини автоматлаштириш;
- қишлоқ хўжалиги экинларини суғоришда сувни тежайдиган технологиялар билан қамраб олинган ерларнинг умумий майдонини 2 млн гектаргача, шу жумладан, томчилаб суғориш технологиясини 600 минг гектаргача етказиш;
- сув хўжалигида давлат-хусусий шериклик (ДХШ) тамойиллари асосида 50 та лойиҳани амалга ошириш.
Ҳужжатни амалга ошириш билан Сув хўжалиги вазирлигининг янги бошқармаси шуғулланади, у бир ой муддатда ташкил этилади. Ишга хорижий экспертлар жалб этилади. Сув хўжалигини ривожлантириш лойиҳаларини, шу жумладан ташқи қарзлар ҳисобидан молиялаштириш режалаштирилмоқда. Жалб қилинган маблағлар ҳисобига амалга оширилаётган лойиҳалар самарадорлиги бўйича ҳар йил якуни бўйича Вазирлар Маҳкамасига ахборот киритиб борилади.
Олий Мажлис, Жўқорғи Кенгес ҳамда халқ депутатлари вилоят Кенгашлари ҳам амалга оширилган ишлар тўғрисида масъул шахсларнинг ахборотларини ҳар чоракда эшитиб бориб, дастурий чора-тадбирлар ижро этилиши устидан назорат ўрнатади.
Концепцияни амалга ошириш натижасида тежаладиган маблағлар сув иншоотларини модернизация қилиш, моддий-техника базасини такомиллаштириш ва соҳа ходимларининг ойлик иш ҳақини босқичма-босқич оширишга йўналтирилиши кутилмоқда. Бунда сув хўжалиги тизимидаги раҳбар ва мутахассис ходимларнинг малакасини ошириш тизими такомиллаштирилади. 1 октябрга қадар янги тартиб бўйича Ҳукуматга таклиф киритишлари керак.
! Соҳа вазирлиги балансида бўлган сув хўжалиги объектлари ДХШ шартлари асосида хусусий секторга берила бошлайди. Дастлабки босқичда қишлоқ хўжалиги экин ерларини ўз балансига олган кластерларда жойлашган объектлар берилади. Улар билан тўғридан-тўғри музокаралар ўтказиш асосида битим тузилади. 3 ой муддатда бериладиган объектлар рўйхати тузилади.
Олег Заманов.
