Вазирлар Маҳкамаси 27.04.2021 йилдаги “Қишлоқ хўжалиги техникаси учун бутловчи ва эҳтиёт қисмлар ишлаб чиқаришни кенгайтириш ва уларга хусусий хизматлар кўрсатадиган объектларни ташкил этиш чора-тадбирлари тўғрисида”ги 240-сон қарорни қабул қилди.
Қарор билан 2021-2022 йилларда қишлоқ хўжалиги техникаси учун бутловчи ва эҳтиёт қисмлар ишлаб чиқаришни маҳаллийлаштириш, соҳада кооперация алоқаларини кенгайтириш ҳамда техник хизмат (сервис) кўрсатиш объектларини ташкил қилиш дастури (кейинги ўринларда - Дастур) тасдиқланди. У Иқтисодий тараққиёт ва камбағалликни қисқартириш вазирлиги томонидан давлат бошқаруви ва маҳаллий ижро этувчи ҳокимият органлари таклифлари асосида ишлаб чиқилган.
Дастур қуйидагиларни ўз ичига олади:
- қишлоқ хўжалиги техникасини ишлаб чиқаришда ва уларга сервис хизматларини кўрсатишда ишлатиладиган бутловчи ва эҳтиёт қисмлар бўйича ҳудудлар ва тармоқлараро саноат кооперациясининг мақсадли параметрлари;
- ҳудудларда қишлоқ хўжалиги техникаси учун бутловчи ва эҳтиёт қисмлар ишлаб чиқаришни маҳаллийлаштиришнинг мақсадли параметрлари;
- 2021-2022 йилларда қишлоқ хўжалиги техникаси учун зарур бутловчи ва эҳтиёт қисмларни кооперация асосида етказиб бериш манзилли кўрсаткичлари;
- қишлоқ хўжалиги техникасига техник (сервис) хизмат кўрсатиш объектларини ташкил қилишнинг манзилли дастури.
Мавжуд ишлаб чиқаришларни кенгайтириш ва саноат маҳсулотларининг янги турларини ишлаб чиқаришни ўзлаштириш бўйича комиссияга Дастурга қўшимча ва ўзгартиришлар киритиш ҳуқуқи берилди.
"Ўзавтосаноат" АЖга "Қишлоқ хўжалиги машинасозлиги конструкторлик-технологик маркази" МЧЖ ва бошқа қишлоқ хўжалиги машинасозлиги ташкилотлари билан биргаликда қишлоқ хўжалиги техникаси учун бутловчи ва эҳтиёт қисмлар ишлаб чиқариш ҳамда уларга техник хизмат кўрсатиш бўйича лойиҳаларни амалга ошираётган тадбиркорлик субъектларини техник қўллаб-қувватлаш бўйича зарур чора-тадбирларни амалга ошириш тавсия этилди.
"Ўзагросервис" АЖга Давлат активларини бошқариш агентлиги, Қорақалпоғистон Вазирлар Кенгаши ва вилоятлар ҳокимликлари билан биргаликда 2021 йил якунига қадар соҳага хусусий инвестицияларни жалб қилиш, ўз таркибидаги машина-трактор парклари негизида кўп тармоқли замонавий таъмирлаш ва сервис марказларини ташкил этиш тавсия этилди.
Иқтисодий тараққиёт ва камбағалликни қисқартириш вазирлиги, "Ўзагросервис" АЖга Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда Дастур доирасида белгиланадиган кўрсаткичларнинг тўлиқ ҳажмда бажарилиши юзасидан таъсирчан назорат ўрнатиш топширилди.
Ҳужжат Қонун ҳужжатлари маълумотлари миллий базасида эълон қилинган ва 28.04.2021 йилдан кучга кирди.
Баҳодир Бухорий.
