Вазирлар Маҳкамасининг 08.07.2022 йилдаги “Оилавий тадбиркорликни ривожлантириш дастурларининг ягона электрон платформаси орқали кредитлар ажратиш тартиби тўғрисидаги низомни тасдиқлаш ҳақида” 373-сон қарор қабул қилинди.
Низом қуйидаги тартибларни белгилайди:
- давлат дастурлари доирасида кредит олиш учун аризаларни барча босқичларда ягона электрон платформаси орқали кўриб чиқиш;
- кредит ажратиш бўйича ҳужжатларни электрон кўринишда шакллантириш;
- кредитларни Ягона электрон платформа орқали скоринг баҳолаш натижаларига кўра ажратиш;
- ҳоким ёрдамчилари томонидан кредит ажратиш учун тавсиянома ёки кредит ажратишни рад этиш тўғрисидаги хулосаларни тақдим этиш;
- ажратилган кредитлар ҳисобидан товар ва хизматларни Ягона электрон платформада яратилган «маркетплейс» тизими ёрдамида эркин сотиб олиш ёки сотиш;
Дастурлар доирасида кредитлар тадбиркорликни йўлга қўйиш ёки ривожлантириш, ҳунармандчиликни молиявий жиҳатдан қўллаб-қувватлаш, аҳолига қўшимча даромад манбаи яратиш ва уларнинг бандлигини таъминлаш мақсадлари учун ажратилади.
Кредитлар қуйидаги мақсадлар учун ажратилмайди:
- илгари олинган кредитларни ёки ҳар қандай бошқа қарзларни қайтариш;
- алкоголь ва тамаки маҳсулотлари ишлаб чиқариш;
- савдо-воситачиликни амалга ошириш;
- ишлаб чиқариш (хизмат кўрсатиш) мақсадлари учун ишлатилмайдиган шахсий мулкни (мебель, уяли телефон, маиший техника ва бошқалар) сотиб олиш;
- енгил автотранспорт воситалари, жумладан, йўловчи ташувчи автомобиллар сотиб олиш;
- маъмурий харажатларни тўлаш, жумладан, хизмат автомобиллари таъминоти;
- бино ва иншоотлар сотиб олиш ва қуриш.
Ҳужжат Қонун ҳужжатлари маълумотлари миллий базасида эълон қилинган ва 08.07.2022 йилдан кучга кирди.
Саодат Усманова.
