Марказий банк Бошқарувининг қарори (рўйхат рақами 2014-4, 14.09.2018 й.) билан Банкларни рўйхатга олиш ва улар фаолиятини лицензиялаш тартиби тўғрисида низомга ўзгартиришлар киритилди.
Илгари бир акциядор ёки ўзаро боғлиқ акциядорлар гуруҳининг банк устав капиталидаги улуши (давлат улушидан ташқари) устав капитали умумий миқдорининг 25%идан ошиши мумкин эмас. Бу чет эл капитали иштирокидаги банклар ва хусусий банкларга татбиқ этилмас эди. Энди чеклов бутунлай олиб ташланди.
Чет эл капитали иштирокидаги банкларда чет эллик инвесторларнинг улуши камида 30%ини ташкил қилиши керак эди. Бу энг қуйи поғона 15%гача пасайтирилди.
Ҳужжат Қонун ҳужжатлари маълумотлари миллий базасида эълон қилинган ва 15.09.2018 йилдан кучга кирди.
Самир Латипов.