Президентнинг 1.12.2017 йилдаги ПФ-5270-сон “Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида”ги Фармони билан улар учун имтиёзли солиқ ставкалари жорий этилди. Бу ҳақда давлат раҳбари сайтида хабар берилади.
2018 йил 1 январдан бошлаб I ва II гуруҳ ногиронлиги бўлган шахс ҳисобланган якка тартибдаги тадбиркорлар ягона ставка бўйича қатъий белгиланган солиқ тўлайди (фаолият кўрсатиш тури ва уни амалга ошириш жойидан қатъи назар) – ойига ЭКИҲнинг 50%и.
Якка тартибдаги тадбиркор томонидан I ва II гуруҳ ногиронлиги бўлган шахслар ҳисобидан ишга ёлланган ҳар бир ишчи учун қатъий белгиланган солиқ эса бир ойда ЭКИҲнинг 15%ини ташкил этади. Ушбу ҳолатда якка тартибдаги тадбиркорнинг ўзида ногиронликнинг бўлиши, шунингдек фаолият кўрсатиш тури ва уни амалга ошириш жойи аҳамиятга эга эмас.
Маълумот учун:
1. Ногиронлик ва унинг даражаларини аниқлаш тартиби Вазирлар Маҳкамасининг 1.07.2011 йилдаги 195-сон “Тиббий-меҳнат эксперт комиссиялари томонидан фуқароларни тиббий кўрикдан ўтказиш тартибини янада такомиллаштиришга, ногиронликни ва касбий меҳнатга лаёқат йўқотилиши даражасини аниқлашга йўналтирилган норматив-ҳуқуқий ҳужжатларни тасдиқлаш тўғрисида”ги қарори билан тартибга солинади.
2. Ҳозирги вақтда якка тартибдаги тадбиркорлар юридик шахс ташкил этмасдан 81 фаолият турлари билан шуғулланиши мумкин. Уларнинг тўлиқ рўйхати билан бу ерда танишиш мумкин.
3. Якка тартибдаги тадбиркорларга фаолият турлари кесимида рухсат бериладиган ходимларни ёллаш сони Хусусий тадбиркорлар томонидан ходимларни ёллаган ҳолда тадбиркорлик фаолиятини амалга ошириш тартиби тўғрисида Низом билан (Вазирлар Маҳкамасининг 31.07.2015 йилдаги 219-сон қарорига 1-илова) белгиланган.
4. 2017 йил учун якка тартибдаги тадбиркорлардан олинадиган қатъий белгиланган солиқ ставкалари Президентнинг 27.12.2016 йилдаги ПҚ-2699-сон қарорига 12-иловада келтирилган.
Мазкур ҳужжатнинг матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Самир Латипов.
