Вазирлар Маҳкамасининг 29.07.2026 йилдаги 416-сон қарори билан Тариф квоталарини жорий этиш ва маъмурий бошқарув тартиби тўғрисидаги низом тасдиқланди.
Ҳужжат Президентнинг 02.06.2023 йилдаги "Ўзбекистон Республикасининг Жаҳон савдо ташкилотига аъзо бўлиш жараёнини жадаллаштиришга доир қўшимча чора-тадбирлар тўғрисида"ги ПҚ-181-сон қарорига мувофиқ ишлаб чиқилган.
Ички бозорни сифатли маҳсулотлар билан тўлдириш, ички талабни рағбатлантириш мақсадида қуйидагиларни назарда тутувчи Тариф квоталарини жорий этиш ва маъмурий бошқарув тартиби тўғрисидаги низом тасдиқланди:
- импорт қилинадиган маҳсулотларга тариф квоталарини жорий этиш тартиби;
- импорт қилувчилар ўртасида тариф квоталарини тақсимлаш усуллари ва механизми.
Низом миқдорий чекловлар сифатида фойдаланиладиган импорт квоталари ва ҳимоя чораларига татбиқ этилмайди.
Ҳужжатда қуйидаги тушунчалардан фойдаланилади:
• анъанавий импортчилар – ўтган давр маълумотлари асосида аниқланадиган ва тариф квотасига эга бўлган импорт қилинадиган маҳсулотларнинг умумий ҳажмида камида 5 фоиз улушга эга бўлган ташқи иқтисодий фаолият иштирокчилари;
• "аралаш тақсимлаш" усули – тариф квотаси умумий ҳажмининг бир қисмини анъанавий импортчилар ўртасида ўтган давр импорт улушларига мутаносиб равишда тақсимлаш, қолган қисмини эса "ким биринчи келган бўлса, ўша олган" усули бўйича тақсимлаш;
• "ким биринчи келган бўлса, ўша олган" усули – Божхона қўмитасининг Ягона автоматлаштирилган ахборот тизими божхона юк декларацияларини қабул қилган календарь кунларнинг хронологик кетма-кетлиги асосида тариф квотаси ҳажмини тақсимлаш усули.
Тариф квотасини жорий этиш тўғрисидаги қарор тариф квотаси кучга киришидан камида 30 календарь кун олдин қабул қилиниши керак.
Тариф квоталари, агар Ўзбекистон Республикасининг халқаро битимларида бошқача қоида назарда тутилмаган бўлса, маҳсулот қайси мамлакатда ишлаб чиқарилганидан қатъи назар, ариза берувчилар ўртасида тақсимланади.
Ариза берувчилар ўртасида тариф квоталарини тақсимлаш уларнинг тенг ҳуқуқлилиги ҳамда мулкчилик шакли ва рўйхатга олинган жойи бўйича камситмаслик принциплари асосида амалга оширилади.
Ҳужжат Қонун ҳужжатлари маълумотлари миллий базасида эълон қилинган ва 30.07.2026 йилдан кучга кирди.
Лола Абдуазимова
