Президент томонидан 21.04.2025 йилда «Давлат органлари ва ташкилотларининг коррупцияга қарши ички назорат бўлинмалари мустақиллигини таъминлаш ҳамда фаолияти самарадорлигини ошириш чора-тадбирлари тўғрисида»ги Қарор имзоланди.
Коррупцияга қарши ички назорат бўлинмаси ўз фаолиятида бевосита ташкилот раҳбарига, устав фондида (устав капиталида) давлат улуши 50% ва ундан ортиқ бўлган хўжалик жамиятларида эса Кузатув кенгашига (ушбу кенгаш мавжуд бўлмаган тақдирда – корхона раҳбарига) ҳисобдор бўлади.
Коррупцияга қарши курашиш агентлигининг коррупцияга қарши ички назорат бўлинмалари ходимларини моддий рағбатлантириш тўғрисидаги тақдимномаларини кўриб чиқиш ушбу ходимлар фаолият юритаётган ташкилотлар учун мажбурий ҳисобланади.
Давлат органлари ва ташкилотларининг коррупцияга қарши ички назорат бўлинмаларининг биринчи марта лавозимга тайинланган ходимлари қуйидаги тартибда икки ҳафталик стажировкадан ўтади:
- давлат органлари ва ташкилотлари марказий аппаратининг коррупцияга қарши ички назорат бўлинмалари раҳбарлари ва ходимлари – Агентликда;
- ҳудудий бўлинмалар ва таркибий ташкилотлар ходимлари – давлат органлари ва ташкилотлари марказий аппаратининг коррупцияга қарши ички назорат бўлинмаларида.
Ҳуқуқий экспериментни ўтказиш даврида (2027 йил 1 январга қадар) қуйидаги тизим жорий этилади:
- Соғлиқни сақлаш вазирлиги, Қурилиш ва уй-жой коммунал хўжалиги вазирлиги, Сув хўжалиги вазирлиги, "Ўзбекнефтгаз" АЖ, "Ўзсувтаъминот" АЖнинг коррупцияга қарши ички назорат бўлинмаси раҳбари лавозимига Агентлик ходимлари тайинланади;
- ҳудудий бўлинмалар ва таркибий ташкилотлар ходимлари – давлат органлари ва ташкилотлари марказий аппаратининг коррупцияга қарши ички назорат бўлинмаларида.
Ҳужжат ЎзАда эълон қилинган.
Собир Нурбердиев
