Вазирлар Маҳкамасининг 28.02.2026 йилдаги "Тошкент шаҳрида комплекс қурилиш тамойили асосида йирик инвестиция лойиҳаларини амалга ошириш ҳамда яшил ҳудудларни барпо этиш жараёнларини жадаллаштириш чора-тадбирлари тўғрисида"ги 83-сон қарори қабул қилинди.
Ҳужжат билан Тошкент шаҳрининг 2045 йилгача бўлган бош режасининг асосий кўрсаткичларига ўзгартиришлар киритилди. (24.12.2024 й. 880-сон ВМҚ).
Хусусан, янги турар жой мавзелари, меҳмонхоналар, бизнес марказлари, ижтимоий объектлар ва саноат зонасини қуриш бўйича инвестиция лойиҳалари параметрлари киритилган.
Қайд этилишича, хорижий ва маҳаллий инвесторлар томонидан 2311,4 гектар майдонда амалга оширилаётган умумий қиймати 16,2 миллиард доллардан ортиқ бўлган 31 та инвестиция лойиҳасининг концепциялари ишлаб чиқилган.
Улар комплекс қуриш тамойили асосида амалга оширилади, бунда ҳар бир лойиҳа ҳудудининг камида 30 фоизи яшил майдонларга ажратилиши керак.
Ҳужжатда эскирган турар-жой мавзеларини комплекс янгилаш, 1 гектаргача бўлган майдонларда майда ва зич қурилишлардан воз кечиш кўзда тутилган.
Шунингдек, қурувчилар томонидан тўланадиган инфратузилма тўловлари ва бошқа ажратмалар ҳисобидан қўшимча жамоат парклари ташкил этилади.
Бектемир, Миробод, Сергели, Чилонзор, Яшнобод, Мирзо Улуғбек, Шайхонтоҳур, Юнусобод, Учтепа ва Янгиҳаёт туманларида кўп қаватли турар жой мажмуалари қуриш лойиҳалари режалаштирилган.
Бино ва корхоналарни лойиҳалашда табиий газга муқобил ёқилғи турлари ва энергия тежамкор технологиялардан фойдаланиш кўзда тутилиши керак.
Ҳужжат Қонун ҳужжатлари маълумотлари миллий базасида эълон қилинган ва 03.03.2026 йилдан кучга кирди.
Лола Абдуазимова
