Давлат хусусий шерикка тегишли бўш турган ер участкалари, қурилиши тугалланмаган, реконструкция қилинадиган, капитал таъмирланадиган ёки жиҳозланадиган бино ва иншоотлар негизида нодавлат МТМни ташкил этишда ёрдам беради. Бундай лойиҳаларни амалга ошириш тартиби Вазирлар Маҳкамасининг 22.11.2018 йилдаги 944-сон қарори билан белгиланган.
Эслатиб ўтамиз, мактабгача таълим соҳасида давлат-хусусий шерикликнинг (бундан кейин – ДХШ) эҳтимолий шакллари Президентнинг 5.04.2018 йилдаги ПҚ–3651-сон қарорида белгиланган. Ушбу ҳужжатда лойиҳаларни амалга ошириш ташаббуси билан чиқиш ва молиялаштириш чора-тадбирлари қабул қилинган. ДХШ доирасида нодавлат МТМни ташкил этиш учун кредитлар ва субсидиялар, солиқ ва божхона имтиёзлари берилади.
Мактабгача таълим вазирлиги (бундан кейин – Вазирлик) давлат шериги бўлиб чиқади. ДХШнинг ушбу шакли доирасида у ариза берувчининг ҳужжатларини танлов ўтказмай тўғридан-тўғри музокаралар олиб бориш орқали кўриб чиқади. Битим тузилганидан кейин хусусий шерик лойиҳа умумий қийматининг 25%и миқдорида ўз маблағларини киритади ва 5.04.2018 йилдаги ПҚ–3651-сон қарорда белгиланган имтиёзлардан фойдаланади.
Хусусий шерикдан қандай ҳужжатлар талаб этилади
Юридик шахс-шерик ариза билан бирга Вазирликка қуйидаги ҳужжатларни тақдим этади:
- ер участкасига ва бинога бўлган ҳуқуқ давлат рўйхатидан ўтказилганлиги ҳақидаги гувоҳнома нусхаси;
- ариза тақдим этиладиган кундан узоғи билан 1 ой олдин солиқлар, йиғимлар, бошқа мажбурий тўловлар бўйича қарздорлик ҳамда бошқа молиявий санкциялар йўқлиги тўғрисида маълумот;
- лойиҳа қийматининг камида 25%ини молиялаштириш бўйича хусусий шерикнинг имкониятини тасдиқловчи ҳужжат ёки бошқа ташкилотнинг кафиллиги;
- ташкил этиш режалаштирилган МТМ биносининг тасдиқланган ва келишилган лойиҳа-смета ҳужжатлари;
- экология ва атроф муҳитни муҳофаза қилиш, давлат санитария-эпидемиология назорати органларининг рухсат берувчи хулосалари;
- МТМ биносини қуриш учун дастлабки техник-иқтисодий кўрсаткичлар.
Ариза ҳужжатлар тақдим этилган кундан бошлаб 15 кун ичида кўриб чиқилади. Лойиҳани амалга ошириш мақсадга мувофиқлиги тўғрисида қарор қабул қилинганидан кейин 7 кун мобайнида 30 йил муддатга битим тузилади.
Тасдиқланган лойиҳани амалга ошириш шартлари
Битим тузилганидан кейин хусусий шерик давлат МТМнинг бир нафар тарбияланувчиси учун сарфланадиган харажатлар суммасининг 50%игача миқдорда субсидиялар олиши мумкин.
Баён этилган тартибда қурилган хусусий болалар боғчалари тарбияланувчилар умумий сонининг 25%и миқдорида ижтимоий кўмакка муҳтож оилаларнинг фарзандларини қабул қилишлари ва улар учун имтиёзли ота-оналар тўловини (тегишли ҳудуддаги давлат МТМ учун белгиланган ҳажмлардан ошмайдиган миқдорда) белгилашлари шарт. Ушбу қоида битим амал қиладиган бутун муддат давомида қўлланилади.
Ҳужжат Қонун ҳужжатлари маълумотлари миллий базасида эълон қилинган ва 23.11.2018 йилдан кучга кирди.
Ленара Хикматова.
