Молия вазирлиги ва ДСҚнинг қарори (12.03.2018 йилда 2463-1-сон билан рўйхатдан ўтказилган) билан Давлат рўйхатидан ўтмасдан тадбиркорлик фаолиятини амалга оширувчи жисмоний шахслардан қатъий белгиланган солиқни ундириш тартиби тўғрисидаги низомга ўзгартиришлар киритилди.
Эслатиб ўтамиз, жисмоний шахслар томонидан давлат рўйхатидан ўтмасдан тадбиркорлик фаолиятини амалга ошириш ҳолатларини аниқлаш билан солиқ органлари шуғулланади. Ҳуқуқбузарлар аниқланган тақдирда, маъмурий ҳуқуқбузарлик тўғрисидаги баённома расмийлаштирилиб, уларга Қатъий белгиланган солиқнинг йиллик суммасини тўлаш тўғрисидаги талабнома тақдим этилади.
Ҳуқуқбузар тадбиркорлик фаолиятини ноқонуний амалга ошириш ҳолати аниқланган санадан бошлаб 30 кун ичида қатъий белгиланган солиқнинг йиллик суммасини тўлаши шарт. Бунинг муқобил варианти ҳам бор – ушбу муддат давомида якка тартибдаги тадбиркор сифатида давлат рўйхатидан ўтиши лозим. Шунда қатъий белгиланган солиқ бўйича ҳисобланган солиқ мажбуриятлари суммасини ҳар ой тенг улушларда 12 ой давомида тўлаш мумкин бўлади. Ўзгартиришларга мувофиқ, энди ойлик тўловлар ҳар ойнинг 10-санасидан кечиктирмай амалга оширилади (илгари – 25-санасигача эди).
Ҳужжат Қонун ҳужжатлари маълумотлари миллий базасида расман эълон қилинган ва 12.03.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Олег Заманов.