Вазирлар Маҳкамасининг 15.12.2025 йилдаги 791-сон қарори билан айрим НҲҲга ўзгартириш ва қўшимчалар киритилди, шунингдек баъзилари ўз кучини йўқотган деб ҳисобланди.
Хусусан, Адлия вазирлиги томонидан ишлаб чиқилган таклифлар асосида ҳужжат билан биринчи марта тадбиркорлик соҳасидаги бундай миқдордаги (1 600 дан ортиқ) мажбурий талаблар бекор қилинди.
Хусусан, ҳужжат билан ветеринария хизмати назорати остидаги 1 568 та товар позицияси бўйича маҳсулотларнинг мувофиқлик сертификатини олиш билан боғлиқ мажбурий талаблар, шунингдек, якка тартибдаги тадбиркорлар томонидан туристик хизматлар кўрсатиш ва фаолият турларини амалга оширишдаги айрим ортиқча чекловлар бекор қилинмоқда.
Шунингдек, якка тартибдаги тадбиркорлар томонидан импортни амалга оширишда товар қиймати бўйича 5 000 АҚШ доллари миқдоридаги чеклов олиб ташланди, туристларга уй-жойни 30 кунгача ижарага бериш, ёғочдан мебель ясашга оид талаблар бекор қилинмоқда.
Адлия вазирлигининг таъкидлашича, ҳужжатнинг қабул қилиниши тадбиркорларнинг маъмурий органлар билан ўзаро муносабатларида ортиқча бюрократик тўсиқларни қисқартиришга, шунингдек, харажатлар, вақт ва ресурсларни тежашга хизмат қилади.
Бугунги кунда Тадбиркорлик соҳасидаги мажбурий талабларнинг ягона электрон реестрига 36 мингдан ортиқ мажбурий талаблар киритилган. Адлия вазирлиги ортиқча чекловларни янада қисқартириш мақсадида норматив ҳужжатларни қайта кўриб чиқиш бўйича ишларни давом эттирмоқда.
Ҳужжат Қонун ҳужжатлари маълумотлари миллий базасида эълон қилинган ва 16.12.2025 йилдан кучга кирди.
Лола Абдуазимова
