2026 йил 15 июндаги ЎРҚ-1153-сон Қонун билан айрим қонун ҳужжатларига ноқонуний эгалланган ер участкаларига ҳамда уларда қурилган бино ва иншоотларга бўлган ҳуқуқларни тан олишни жадаллаштиришга қаратилган ўзгартириш ва қўшимчалар киритилди.
Таъкидланишича, қонуннинг қабул қилиниши ваколатли ташкилотларнинг масъулиятини ошириш, ноқонуний эгалланган ер участкалари ва уларда қурилган бино-иншоотларга бўлган ҳуқуқларни тан олишни қийинлаштирадиган айрим механизмларни соддалаштириш ва фуқароларга қўшимча қулайликлар яратиш зарурати билан боғлиқ.
"Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида"ги (05.08.2024 й. ЎРҚ-937-сон) ва "Кўчмас мулкка бўлган ҳуқуқларни давлат рўйхатидан ўтказиш тўғрисида"ги (28.11.2022 й. ЎРҚ-803-сон) қонунларга ўзгартириш ва қўшимчалар киритилди.
Хусусан, фуқароларнинг аризаларини кўриб чиқиш муддати 150 кундан 50 кунга қисқартирилди, фуқароларнинг солиқ қарздорлиги тушунчаларига аниқлик киритилди, ер участкасига бўлган ижара ҳуқуқини тан олиш учун бир марталик тўловни бўлиб-бўлиб тўлаш тартиби ва шартлари белгиланди, шунингдек, ҳуқуқларни тан олиш билан боғлиқ шикоятларни кўриб чиқиш механизмлари такомиллаштирилди.
Амнистияга тушадиган биноларни қуриш муддатлари яна ярим йилга – 1998 йил 1 июлдан 1999 йил 1 январгача узайтирилди.
Шунингдек, ер участкасига бўлган ижара ҳуқуқини тан олиш учун бир марталик тўловни дарҳол ёки бўлиб-бўлиб тўлаш мумкинлиги белгиланмоқда.
Ҳужжат Қонун ҳужжатлари маълумотлари миллий базасида эълон қилинган ва 15.06.2026 йилдан кучга кирди.
Лола Абдуазимова
