Шу санага 25-ялпи мажлис белгиланган. Бундай қарор 2019 йил 10 декабрь куни Олий Мажлис Сенати Кенгашида қабул қилинди.
Мажлисда сенаторлар қатор қонун ҳужжатларини кўриб чиқадилар. Янги таҳрирдаги Солиқ кодекси ва у билан боғлиқ қонун ҳужжатларига тузатишлар, “Давлат божи тўғрисида”ги, “Инвестициялар ва инвестиция фаолияти тўғрисида”ги, “Махсус иқтисодий зоналар тўғрисида”ги, “Ўзбекистон Республикаси Миллий гвардияси тўғрисида”ги, “Мактабгача таълим ва тарбия тўғрисида”ги Қонунлар шулар жумласидан.
Шунингдек, сенаторлар Сурхондарё вилояти Термиз туманининг чегарасини ўзгартириш, Термиз шаҳрининг чегарасини кенгайтириш ҳамда уларнинг чегараларини тасдиқлаш тўғрисидаги масала ҳам кўриб чиқадилар. Ялпи мажлисда адлия вазирининг ахбороти, Навоий вилояти ҳокимининг ҳисоботи эшитилади. Сенаторлар сув объектларига оқинди сувларни оқизиш билан боғлиқ муаммолар юзасидан Вазирлар Маҳкамасига юборилган парламент сўрови натижаларини ҳам муҳокама қиладилар.