Давлат Назаров: «Direktor.uz да онлайн-курсдан ўтди, малака имтиҳонига навбат келди»

Ўнлаб фойдаланувчилар Direktor.uz сайтида онлайн-курсдан ўтишди. Улар орасида «Daewoo Textile» ХК МЧЖ (Фарғона) бош менежери Давлат Назаров ҳам бор.  Шу муносабат билан у norma.uz портали мухбирининг саволларига жавоб берди.

– Давлат, нима сабабдан Direktor.uz ресурсидан фойдаланишга қарор қилдингиз?

– Мен оилавий бизнесни очишни режалаштиряпман. Direktor.uz дан фойдаланишни бошлаганимда, ўз билим ва кўникмаларимни мустақил баҳолаш истагида эдим. Стартапни муваффақиятли ривожлантириш учун яна ўқиб-ўрганиш зарур экан. Тизимда буни амалга ошириш имконияти мавжудлиги жуда қўл келди. Йирик корхонадаги жамоада ишлаш ва тадбиркорлик фаолияти, айниқса раҳбар лавозимида ишлаш – булар бир-биридан фарқ қилади. Буни Direktor.uz даги машғулотлар ҳам тасдиқлайди. Бешинчи дарсгача тест топшириқларини ечишда ҳеч қандай қийинчиликлар бўлмади, кейин эса ўқув материалига мурожаат қилишга тўғри келди.

– Direktor.uz да ўқув материалини ўқиш ва видеодарсларни кўриш орқали билим олиш мумкин. Қайси усул сизга кўпроқ маъқул келди? 

– Назаримда, босма материал осон ўзлаштирилади, шу боис мен асосан материалларни ўқидим. Тушуниш ва ёдда сақлаб қолишда карикатуралар ёрдам беради. Лекин бошқа тарафдан қарайдиган бўлсак, ресурсни ишлаб чиқувчилар томонидан имконият даражасида ўқитишнинг турли йўлларидан, хусусан, видеодарслардан ҳам фойдаланиш назарда тутилган. Булар ёрдамида кўпчилик зарур билимларни эгаллаши мумкин.

– Сизнингча, Direktor.uz бошловчи тадбиркор учун ёрдамчи бўла оладими?

–  Агар инсонда тадбиркорликка қобилият бўлса-ю, лекин маълум билим ва кўникмалар етишмаса, ресурс албатта ёрдам беради. Бу ерда бизнес-режани тўғри тузиш, корхона юридик шаклини тўғри танлаш, рўйхатдан ўтказиш ва ҳоказолар ҳақидаги зарур маълумотларни топиш мумкин. Шахсан мен учун ресурс жуда фойдали бўлди.

Олег Гаевой суҳбатлашди.