Жиноят-процессуал кодексга тадбиркорлик субъектларига ва давлат улуши камида 50% бўлган хўжалик юритувчи субъектларга нисбатан жиноят иши бўйича тафтиш ўтказиш муддатларини эҳтимолий узайтиришни ҳисобга олган ҳолда чеклайдиган тузатишлар киритилди (20.07.2018 йилдаги ЎРҚ–485-сон Қонун).
Таҳририятдан: ушбу ҳужжат ва 75 000 та бошқа норматив-ҳуқуқий ҳужжатлар тушунтиришлари билан бирга «ЎзР қонунчилиги» АҚТда жамланган. Намойиш версиясини бу ерда юклаб олинг (32,1 МБ).
Эслатиб ўтамиз, жиноят иши бўйича тафтиш ўтказиш (молия-хўжалик фаолиятининг режали/режадан ташқари солиқ текшируви билан адаштирманг) – жиноят иши учун аҳамиятли бўлган ҳолатлар ҳақидаги маълумотларни олиш учун юридик шахслар ва якка тартибдаги тадбиркорларнинг бухгалтерия, молия, статистика, банк ҳужжатларини ва бошқа ҳужжатларини ўрганиш ҳамда таққослаб кўриш. Тадбиркорлик субъектининг фақат қўзғатилган жиноят иши билан боғлиқ фаолияти тафтиш билан қамраб олинади. Жиноят иши бўйича тафтиш ўтказиш алгоритми – бу ерда.
Тафтиш ўтказиш муддати 30 календарь кундан иборатдир, бироқ зарур бўлган тақдирда, текширилаётган субъектнинг ҳужжатлари ҳажми, фаолиятининг тури ва кўламлари ҳисобга олинган ҳолда, у узайтирилиши мумкин. Аввалбошдан шундай эди, бироқ тафтиш ўтказиш муддатини узайтириш тартиб-таомилининг айрим жиҳатлари ўзгарди.
Биринчидан, энди узайтирилиши мумкин бўлган тафтиш ўтказиш муддати текширилаётган субъектга қараб табақалаштирилади:
- тадбиркорлик субъектларига нисбатан – 30 календарь кунга;
- давлат органлари ва ташкилотларига, шунингдек давлат улуши 50% ва ундан ортиқ миқдорда бўлган хўжалик юритувчи субъектларга нисбатан – суриштирувнинг (ЖПКнинг 3817-моддаси), дастлабки терговнинг (ЖПКнинг 351-моддаси) ва суд мажлисида жиноят ишини муҳокама қилишнинг муддатларидан (ЖПКнинг 405, 4051-моддалари) ошмайдиган муддатга.
! Шу тариқа, тадбиркорлик субъектларига ва устав фондидаги давлат улуши камида 50% бўлган хўжалик юритувчи субъектларга нисбатан жиноят иши бўйича тафтиш ўтказишнинг энг кўп муддати, уни эҳтимолий узайтиришни ҳисобга олган ҳолда, 60 календарь кунни ташкил этади. Илгари узайтирилишини ҳисобга олганда суриштирув, тергов ва суд жараёнининг белгиланган муддатлари доирасида (юқорига қаранг), яъни анча узоқ давом эттирилиши мумкин эди.
Иккинчидан, ишни судга қадар юритиш босқичида тафтиш суриштирувчининг, терговчининг ёки прокурорнинг қарори билан узайтирилади. Киритилган тузатишларга кўра, бунинг учун энди Бош прокурорнинг ёки унинг ўринбосарининг розилиги керак.
Суд муҳокамаси босқичида, худди илгаригидек, тафтиш ўтказиш муддатини узайтириш тўғрисида суд ажрими қабул қилинади (Бош прокурорнинг ёки унинг ўринбосарининг розилиги талаб этилмайди).
Ҳужжат Қонун ҳужжатлари маълумотлари миллий базасида эълон қилинган ва 21.07.2018 йилдан кучга кирди.
Олег Заманов.
