Вазирлар Маҳкамасининг 2.09.2019 йилдаги 724-сон қарори билан унинг таркибига Янгийўлдаги фойдаланилмаётган объектлар ва учта корхона ҳудуди қўшилади.
Эслатиб ўтамиз, 2017 йилда Тошкент вилоятининг шаҳар ва туманларида 17 та кичик саноат зоналари ташкил этилган (10.08.2017 йилдаги ПҚ-3194-сон қарорга қаранг), улардан 6 таси 2018 йилда кенгайтирилган эди (8.08.2018 йилдаги 634-сон ВМҚ). Уларда амалга ошириладиган инвестиция лойиҳаларини молиялаштириш учун 100 млн АҚШ доллари миқдорида кредит линиялари очилган. Ҳужжатда КСЗларни муҳандислик коммуникациялари билан, ишлаб чиқариш инфратузилмаси ва лойиҳаларни молиялаштиришни таъминлаш ишларида камчиликлар мавжудлиги таъкидланган.
Шу муносабат билан Янгийўл туманидаги КСЗ таркибига Янгийўл шаҳрида жойлашган, давлат мулкида бўлган фойдаланилмаётган ишлаб чиқариш майдонлари ва ер участкалари ҳамда давлат улушига эга хўжалик жамиятларини киритишга қарор қилинди. Рўйхатда учта корхона қайд этилган: «Биокимё» АЖ, «Янгийўл ёғ-мой» АЖ ва «Янги сифат» МЧЖ.
Жорий йилнинг охирига қадар баланс сақловчиларнинг бюджет ва бюджетдан ташқари жамғармалар олдидаги қарзларини қолдиқ баланс қиймати ёки қарз мавжуд бўлмаган тақдирда кейинги солиқ тўловлари ҳисоби-китоби суммасига камайтириш шарти билан объектларни шаҳар ҳокимиятига бериш мўлжалланмоқда.
Берилаётган объектларда жойлаштириладиган тадбиркорлик субъектлари 10.08.2017 йилдаги ПҚ-3194-сон қарорда назарда тутилган шартларда фаолият юритадилар. Импорт ўрнини босувчи ва экспортга йўналтирилган тайёр маҳсулотлар, материаллар ва бутловчи буюмларни ишлаб чиқариш корхоналарини жойлаштириш бўйича «Йўл хариталари» 2 ой муддатда тасдиқланади.
Ҳужжат Қонун ҳужжатлари маълумотлари миллий базасида эълон қилинган ва 4.09.2019 йилдан кучга кирди.
Ленара Хикматова.
