«Энергиядан оқилона фойдаланиш тўғрисида»ги Қонунга тузатишлар киритилди (14.07.2020 йилдаги ЎРҚ-628-сон Қонунга қаранг).
Қонун лойиҳаси муҳокамаси чоғида сенаторлар тузатишлар иқтисодиёт тармоқларида ва ижтимоий соҳада энергия истеъмолини оптималлаштиришга қаратилганлигини таъкидладилар, бу аҳолининг реал даромадлари ошишига олиб келади. Қонунга киритилаётган ўзгартириш ва қўшимчаларда нималар назарда тутилган?
Биринчидан, энергия жиҳатидан самарадор ва энергияни тежайдиган технологияларни жорий этиш бўйича товарлар (ишлар, хизматлар) норматив ҳужжатларда кўрсатилган энергия жиҳатидан самарадорлик кўрсаткичларига мувофиқлиги юзасидан мажбурий сертификатлашдан ўтказилиши лозим.
Иккинчидан, энергиядан оқилона фойдаланиш соҳасидаги давлат сиёсатининг қуйидаги асосий йўналишлари қайта кўриб чиқилди:
- давлат, тармоқ ва ҳудудий дастурлар ҳамда лойиҳаларни амалга ошириш;
- иқтисодиётни жадал ривожлантириш учун зарур бўлган энергиянинг ҳосил қилинишини ва сарфланишини барқарорлаштириш;
- энергиянинг ҳосил қилиниши ва сарфланиши режимларини мақбуллаштириш, унинг ҳисобга олинишини ташкил этиш;
- энергия жиҳатидан самарадор ва энергияни тежайдиган асбоб-ускуналар ҳамда энергия сарфи миқдори энг кам бўлган маҳсулотлар ишлаб чиқарилишини рағбатлантириш;
- энергия ҳосил қилувчи ва энергияни ишлатувчи асбоб-ускуналар ҳамда маҳсулотга доир норматив ҳужжатларга энергия жиҳатидан самарадорлик ва энергия жиҳатидан тежамкорлик кўрсаткичларини киритиш;
- энергиянинг сифати, ишлаб чиқаришнинг энергия жиҳатидан самарадорлиги ва энергия тежамкорлиги ҳамда маҳсулотга энергия сарфи миқдори устидан давлат текшируви ва назоратини ташкил этиш;
- корхоналар, муассасалар ва ташкилотларда энергия жиҳатидан самарадорлик ва энергия тежамкорлиги текширувларини ташкил этиш;
- маҳсулотнинг, ишлаб турган ва реконструкция қилинаётган объектларнинг, технологиялар ва асбоб-ускуналарнинг энергетика экспертизасини ўтказиш;
- энергетика жиҳатидан самарадор бўлган лойиҳаларни амалга ошириш учун энергия жиҳатидан самарадорлик ва энергия жиҳатидан тежамкорлик намойиш этиладиган зоналарни барпо этиш;
- энергия жиҳатидан самарадор, энергия жиҳатидан тежамкор ва экологик хавфсиз технологияларни ҳамда ишлаб чиқаришларни ривожлантиришни рағбатлантириш;
- энергиянинг ҳосил қилиниши ва сарфланиши юзасидан статистика кузатувларини ташкил этиш.
Учинчидан, Вазирлар Маҳкамасининг соҳадаги ваколатларига тузатишлар киритилди, шунингдек қуйидагиларнинг ваколатлари белгиланди:
- энергиядан оқилона фойдаланиш соҳасидаги махсус ваколатли орган сифатида Энергетика вазирлиги;
- давлат текшируви ва назорати органлари;
- жойлардаги маҳаллий давлат ҳокимияти органлари.
Тўртинчидан, соҳада амалга ошириладиган дастурлар ва лойиҳалар таснифига бирмунча ўзгартиришлар киритилди:
- қамрови бўйича – давлат, тармоқ ва ҳудудий (илгари – миллий, тармоқ ва ҳудудий);
- муддатлари бўйича – қисқа (1 йилдан 2 йилгача), ўрта (2 йилдан 5 йилгача), узоқ (5 йил ва ундан ортиқ) муддатли. Бунга қадар кўрсатиб ўтилган ҳужжатлар 5 йил ва ундан ортиқ давом этадиган муддатга ишлаб чиқилар эди.
Қонун «Халқ сўзи» газетасида эълон қилинган ва 15.07.2020 йилдан кучга кирди.
Олег Заманов.
