Вазирлар Маҳкамасининг 26.11.2025 йилдаги "Истиқболли кадрларни қайта тайёрлаш ва уларнинг хорижда мақсадли стажировкасини ташкил этиш чора-тадбирлари тўғрисида"ги 743-сон қарори қабул қилинди.
Ҳужжат билан Президентнинг 05.05.2025 йилдаги ПФ-78-сон Фармонига мувофиқ қуйидагилар тасдиқланди:
- "Эл-юрт умиди" жамғармаси маблағлари ҳисобидан истиқболли мутахассисларнинг мақсадли стажировкасини ташкил этиш тартиби тўғрисидаги низом;
- Президент ҳузуридаги Давлат сиёсати ва бошқаруви академияси ўқув дастурларига номзодларни танлаш тартиби тўғрисидаги низом.
"Эл-юрт умиди" жамғармаси Васийлик кенгаши Агентлик томонидан 15 январга қадар тақдим этилган асослантирилган таклифлар асосида хорижий давлатларда стажировка ўташ дастури квоталарини тасдиқлайди.
Мақсадли стажировка ўташ учун номзодларни танлаб олиш учун Агентликда камида етти кишидан иборат таркибда қабул комиссияси ташкил этилади, бунда унинг сони тоқ сондан иборат бўлади.
Танлов жараёни қуйидагиларни ўз ичига олади:
- Тест синовлари – билим ва кўникмаларни аниқлаш учун;
- номзодлар билан суҳбат – уларнинг касбий салоҳиятини, чет тилини билиш даражасини, касбий ва малакавий ривожланишга интилишини баҳолаш учун.
Раҳбар кадрларни баҳолаш марказида ўтказилган тест натижаларига кўра 71 фоиз ва ундан юқори балл тўплаган номзодлар суҳбатга таклиф этилади.
2026 йил 1 январдан бошлаб Президент ҳузуридаги Давлат сиёсати ва бошқаруви академиясида 6 ойгача бўлган муддатда қуйидаги қайта тайёрлаш таълим дастурлари жорий этилади:
- Президент Администрацияси топшириқларига мувофиқ ташкил этиладиган геосиёсат, глобал хавфсизлик, барқарор ривожланиш, лойиҳа бошқаруви, ижтимоий-иқтисодий сиёсат ва бошқа долзарб йўналишлар бўйича махсус курслар;
- "Раҳбар аёллар" дастури – раҳбарлик кўникмаларини ривожлантириш ва ташаббускор аёлларни давлат хизматига тайёрлаш учун;
- "Келажак лидерлари" – истиқболли ёшларни давлат хизматига жалб қилиш ва ёш давлат хизматчиларининг етакчилик ва бошқарув кўникмаларини ривожлантириш учун;
- "Тизимли таҳлил, стратегик режалаштириш ва мақсадли кўрсаткичларга эришиш" – давлат органлари ва ташкилотларининг раҳбар ва бошқарув кадрлари ҳамда ушбу лавозимларга номзодлар учун;
- "Ҳудудларни ижтимоий-иқтисодий ривожлантириш ва хорижий инвестицияларни жалб этиш" – ҳокимлар ва уларнинг ўринбосарлари ҳамда ушбу лавозимларга номзодлар учун;
- "Кадрлар захирасини шакллантириш ва инсон ресурсларини ривожлантириш" – давлат органлари ва ташкилотларининг кадрлар сиёсатига масъул таркибий бўлинмалари раҳбарлари учун;
- "Давлат дастурлари ва лойиҳаларини самарали бошқариш" – давлат, тармоқ ва ҳудудий ривожланиш дастурлари лойиҳаларини бошқариш ва мониторинг қилиш кўникмаларини ривожлантириш учун.
Бошқарув самарадорлиги агентлиги қайта тайёрлаш таълим дастурлари бўйича манфаатдор вазирлик, идора ва ташкилотларнинг таклифлари асосида номзодлар рўйхатини шакллантиради ҳамда уларни ҳар томонлама ўрганиб, баҳолаб, ҳар йили 1 июлга қадар Академияга тақдим этади.
Академияда ташкил этиладиган малака ошириш курсларида давлат хизматчиларининг Ўзбекистон Конституцияси, унинг тарихи ва маданияти, давлат тили, одоб-ахлоқ қоидалари ва бошқа йўналишлар бўйича билимлари мажбурий баҳоланади.
Ҳужжат Қонун ҳужжатлари маълумотлари миллий базасида эълон қилинган ва 27.02.2026 йилдан кучга киради.
Лола Абдуазимова
