Вазирлар Маҳкамасининг 24.06.2025 йилдаги «Туризм объектлари ҳамда жойлаштириш воситаларида атроф-муҳитга салбий таъсири камайтирилган маҳсулотлардан фойдаланиш ва экологик талабларга мувофиқ кўрсатиладиган хизматларни рағбатлантириш чора-тадбирлари тўғрисида» 385-сон қарори қабул қилинди.
2025 йилдан бошлаб ҳар йили ноябрда «Энг намунали яшил туризм объекти» танлови ўтказилади. Ҳужжат билан танловни ўтказиш тартиби тўғрисидаги Низом тасдиқланди.
Танловнинг асосий вазифалари:
- туризм объектларида пластик маҳсулотлар ва чиқиндилардан фойдаланишни камайтириш;
- туризм объектларида бир марталик пластикдан экологик жиҳатдан тоза (биопарчаланувчи) маҳсулотларга ўтиш ва улардан фойдаланишга кўмаклашиш;
- техник тартибга солиш соҳасидаги экологик талаблар ва экологик мезонларга мувофиқликка эришиш;
- туризм объектларида атроф-муҳитни ва экологияни муҳофаза қилишга қаратилган инновацион ечимлар ва истиқболли ташаббусларни қўллаб-қувватлаш.
Танлов ҳудудий саралаш ва республика якуний босқичларидан иборат.
Танловнинг республика якуний босқичи ғолибларига бир марталик пул мукофоти берилади:
- 1-ўрин – БҲМнинг 150 баравари;
- 2-ўрин – БҲМнинг 100 баравари;
- 3-ўрин – БҲМнинг 50 баравари.
Ҳужжат Қонун ҳужжатлари маълумотлари миллий базасида эълон қилинган ва 26.06.2025 йилдан кучга кирди.
Лола Абдуазимова
