"Ўзбекистон Республикасининг айрим қонун ҳужжатларига коррупцияга қарши курашиш самарадорлигини оширишга, коррупцияга оид жиноятлар учун жавобгарлик муқаррарлигини таъминлашга қаратилган қўшимча ва ўзгартириш киритиш тўғрисида"ги Қонун (22.06.2026 й. ЎРҚ-1155-сон) қабул қилинди.
Ҳужжат жиноят қонунчилигидаги мавжуд бўшлиқларни бартараф этиш, коррупцияга оид ҳуқуқбузарликлар учун жавобгарликни кучайтириш ва миллий ҳуқуқ тизимига халқаро стандартларни жорий этишга қаратилган.
Хусусан, Жиноят кодексига "коррупцияга оид жиноятлар" деган янги атама киритилиб, уларнинг рўйхати белгиланди.
Қонунда пора олганлик ёки пора берганлик ва пора олишда воситачилик қилганлик учун ҳукм қилинган шахсларга нисбатан муддатидан илгари шартли озод қилишни қўллаш тақиқланган.
Бундан ташқари, хизмат мавқеидан фойдаланиб содир этилган фирибгарлик ўта оғир жиноятлар тоифасига кирувчи Жиноят кодексининг 168-моддаси тўртинчи қисмига ўтказилмоқда. Ушбу қилмишни содир этганлик учун 10 йилгача озодликдан маҳрум қилиш жазоси назарда тутилган.
Қонун билан нодавлат ташкилотлар ходимларини пора эвазига оғдириб олганлик учун жавобгарлик кучайтирилмоқда, бу эса ҳам давлат, ҳам хусусий секторда коррупциянинг олдини олишга қаратилган.
Жиноят кодексининг бир қатор моддаларида ғаразли ниятларда жиноят содир этиш жазони оғирлаштирувчи янги квалификация белгиси сифатида мустаҳкамланмоқда.
"Ўзбекистон Республикасининг Ҳисоб палатаси тўғрисида"ги Қонунга киритилган ўзгартишлар давлат органлари ўртасидаги функцияларнинг такрорланишини бартараф этишга қаратилган. Улар идора ваколатларидан коррупцияга қарши ички назорат (комплаенс-назорат) тизимини жорий этиш устидан назорат қилиш функциясини чиқариб ташлашни назарда тутади.
Бундан ташқари, Маъмурий жавобгарлик тўғрисидаги кодексга киритилган ўзгартиришлар давлат харидлари ва бюджет маблағларидан фойдаланиш соҳасидаги қоидабузарликлар учун санкцияларни кучайтиришни назарда тутади.
Ҳужжат Қонун ҳужжатлари маълумотлари миллий базасида эълон қилинган ва 23.06.2026 йилдан кучга кирди.
Лола Абдуазимова
