Президент томонидан 12.01.2026 йилдаги "Марказий Осиё – Хитой" формати котибияти тўғрисидаги низомни ратификация қилиш ҳақида"ги ЎРҚ-1110-сон Қонун имзоланди.
Ҳужжат 2023 йил 19 майдаги Циан декларациясида белгиланган мақсад ва вазифалардан келиб чиққан ҳолда ишлаб чиқилган. "Марказий Осиё – Хитой" формати котибияти Марказий Осиё давлатлари ва Хитой Халқ Республикаси ўртасидаги ҳамкорликни ҳар томонлама илгари суриш ва тегишли механизмларнинг ишлаши учун ташкил этилмоқда.
Котибият ҳамкор давлатлар ўртасидаги келишувларни амалга оширишни мувофиқлаштиради, амалий лойиҳаларнинг самарали бажарилишини таъминлайди ва доимий мулоқот платформасини шакллантиради.
Котибият тўғрисидаги низом "Марказий Осиё – Хитой" шаклидаги котибиятнинг вазифалари, ваколатлари, тузилмаси ва таркибини, шунингдек, унинг ходимларининг ҳуқуқлари, мажбуриятлари ва мақомини белгилайди.
Низомнинг ратификация қилиниши Ўзбекистоннинг минтақавий интеграция жараёнларидаги иштирокини фаоллаштириш, иқтисодий, инвестициявий, инфратузилмавий ва транспорт-логистика алоқаларини ривожлантириш, мамлакатлар ўртасидаги товар айирбошлаш ҳажмини оширишга хизмат қилади.
Ҳужжат Қонун ҳужжатлари маълумотлари миллий базасида эълон қилинган ва 13.01.2026 йилдан кучга кирди.
Лола Абдуазимова
