Вазирлар Маҳкамасининг 19.12.2025 йилдаги "Саноат зоналарида лойиҳалар амалга оширилишини жадаллаштириш бўйича қўшимча чора-тадбирлар тўғрисида"ги 803-сон қарори қабул қилинди.
Ҳужжат билан Саноат зоналари иштирокчилари томонидан тугалланмаган лойиҳаларни амалга оширишга киритилган инвестицияларни баҳолаш, шунингдек, саноат зоналари иштирокчилари томонидан инвестициялар ва қурилиш ишларига сарфланган маблағларни қоплаш шарти билан қурилиши тугалланмаган бино ва иншоотларни янги иштирокчиларга бериш тартиби тўғрисидаги вақтинчалик низом тасдиқланди.
Инвестицияларни баҳолаш инвестор томонидан саноат зонаси иштирокчиси мақомини йўқотганидан кейин лойиҳа доирасида сарфланган харажатларни муайян шартларда қоплаш мақсадида амалга оширилади. Бунда, дирекция ва инвестор ўртасидаги келишувга асосан қурилиши тугалланмаган объектлар қурилишга сарфланган харажатларни қоплаш шарти билан дирекцияга ўтказилади.
Инвесторнинг саноат зонаси иштирокчиси сифатидаги мақоми қонун ҳужжатларида белгиланган тартибда бекор қилинганидан кейин ер участкаси қурилиши тугалланмаган объект билан бирга дирекцияга қайтарилади.
Дирекция икки ҳафта муддатда қурилиши тугалланмаган объектни белгиланган тартибда давлат рўйхатидан ўтказади ва бир ой муддатда уни баҳолайди.
Баҳолаш ўтказилгандан кейин ер участкаси қурилиши тугалланмаган объект билан бирга ёки объект қурилиши тугаллангандан ва янги инвестиция лойиҳасини амалга ошириш учун ундан фойдаланишга рухсат олингандан кейин уч кун ичида электрон онлайн-аукционга жойлаштирилади.
Ғолиб аниқлангандан ва тўловлар амалга оширилгандан сўнг электрон онлайн-аукцион оператори маблағларни Дирекцияга ўтказади, Дирекция эса бир кун муддатда тугалланмаган объектнинг баҳоланган қийматини шартномага мувофиқ иштирокчи мақоми бекор қилинган инвесторнинг банк ҳисобварағига ўтказади.
Бунда электрон онлайн-аукцион савдосидан тушган тушумнинг тугалланмаган объектнинг баҳоланган қийматидан ошган қисми бошқарув ҳисобварағида қолади.
Ҳужжат Қонун ҳужжатлари маълумотлари миллий базасида эълон қилинган ва 20.12.2025 йилдан кучга кирди.
Лола Абдуазимова
