Вазирлар Маҳкамасининг 28.09.2022 йилдаги “Фуқаролик ҳолати далолатномаларини ёзиш тартибларини янада такомиллаштириш чора-тадбирлари тўғрисида”ги 540-сон қарори қабул қилинди.
Туғилганликни тиббиёт муассасалари орқали фуқаролик ҳолати далолатномаларини ёзиш бўлимларида қайд этиш тартиби 2023 йил 1 январдан Тошкент шаҳрида, 2023 йил 1 июндан эса бутун республика ҳудудида жорий этилади.
Туғилганлик ҳолати фуқаролик ҳолати далолатномаларини ёзиш бўлимларида қайд қилинганлиги ҳақида тиббиёт муассасалари томонидан QR-код тасвири туширилган маълумотнома берилади ва ушбу маълумотнома туғилганлик ҳақидаги гербли гувоҳномага тенглаштирилади. Давлат органлари ва ташкилотлар томонидан қабул қилишни рад этиш қатъиян тақиқланади.
2022 йил 1 ноябрдан 2023 йил 1 июлгача қадар никоҳ тузиш ва никоҳдан ажратишни қайд этиш учун аризаларни Сирдарё вилоятининг туман (шаҳар) давлат хизматлари марказлари орқали қабул қилиш бўйича ҳуқуқий эксперимент ўтказилади.
Қарор билан Никоҳ тузиш ва никоҳдан ажратишни қайд этиш учун давлат хизматлари марказлари орқали аризалар қабул қилиш тартиби тўғрисидаги вақтинчалик маъмурий регламент тасдиқланди.
Фуқароларнинг фамилия, исм ва ота исмини ўзгартиришда текширув ўтказиш учун ички ишлар органларига сўровнома юбориш ва фикр олиш ФҲДЁнинг ягона электрон архиви орқали амалга оширилади.
Шунингдек, ҳужжат билан Фуқаролик ҳолати далолатномаларини қайд этиш қоидаларига ўзгартиришлар киритилди. Хусусан, эр-хотиннинг паспорти ёки шахсини тасдиқловчи бошқа ҳужжатларига никоҳ тузилганлиги (бекор қилинганлиги) ҳақида штамп босиш талаби бекор қилинади.
Ҳужжат Қонун ҳужжатлари маълумотлари миллий базасида эълон қилинган ва 29.09.2022 йилдан кучга кирди.
Лола Абдуазимова.
