Вазирлар Маҳкамасининг 29.05.2018 йилдаги 395-сон қарори билан Автомобиль транспортида юкларни ташиш қоидаларига (ВМнинг 1.08.2014 йилдаги 213-сон қарорига илова) қўшимчалар киритилди.
2 та қоида қўшилди:
1) Қурилиш материалларини, қишлоқ хўжалиги маҳсулотларини, саноат ва озиқ-овқат товарларини, шунингдек, бошқа тўкиладиган (иссиқ асфальт, йирик габаритли ва оғир юклардан ташқари) юкларни очиқ автотранспорт воситаларида ташиш юкни мажбурий тартибда брезент ёки бошқа қалин материал билан қоплаган ҳолда амалга оширилади;
2) Автотранспорт воситаларининг қурилиш объектларидан кузовни ва автотранспорт воситаларининг ғилдиракларини ювмасдан умумий фойдаланиладиган йўлларга чиқишига йўл қўйилмайди.
Эслатиб ўтамиз, мазкур нормаларга риоя этмаслик нафақат Автомобиль транспортида юкларни ташиш қоидаларини, балки Йўл ҳаракати қоидаларининг 162-бандини бузиш саналиб, Маъмурий жавобгарлик тўғрисидаги кодекснинг 125-1-моддасига мувофиқ қатъий белгиланган миқдор – 5 ЭКИҲ миқдорида (материални эълон қилиш пайтида – 861 200 сўм) жарима солинишига олиб келади.
Мазкур қоидаларга риоя этилишини назорат қилиш ИИВнинг Давлат йўл ҳаракати хавфсизлиги хизмати зиммасига юкланди.
Ҳужжат Қонун ҳужжатлари маълумотлари миллий базасида эълон қилинган ва 29.05.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Самир Латипов.