Президентнинг 16.06.2023 йилдаги “Аҳолининг енгил автотранспорт воситаларига бўлган эҳтиёжини қондириш бўйича қўшимча чора-тадбирлар тўғрисида”ги ПҚ-193-сон қарори қабул қилинди.
Ҳужжатга асосан, 2026 йил 1 январга қадар, Ўзбекистоннинг божхона чегарасини кесиб ўтиш вақтида ишлаб чиқарилганига 1 йилдан ошмаган янги енгил автотранспорт воситаларини (ТИФ ТН кодлари 8703 21 10, 8703 22 10 ва 8703 31 10) олиб киришда божхона божларининг қуйидаги ставкалари қўлланилади:
- двигатель цилиндрларининг иш ҳажми 1 000 см кубдан ошмайдиган янги енгил автотранспорт воситалари учун – ноль ставкаси (амалдаги ставка – 15% + $0,4 / см куб);
- двигателъ цилиндрларининг иш ҳажми 1 200 см кубдан ошмайдиган янги енгил автотранспорт воситалари учун – 5 фоизли ставкаси (амалдаги ставка – 15% + $0,6 /см куб).
Тегишинча, двигатель ҳажми 1 000 см кубгача бўлган автомобиллар учун божхона божларининг умумий суммаси ҳозирги 39-43%дан 19-23%гача камайтирилади, двигатель ҳажми 1 000-1 200 см куб бўлган автомобиллар учун эса – 44-52%дан 30-36%гача камайтирилади.
Ҳужжат Қонун ҳужжатлари маълумотлари миллий базасида эълон қилинган ва 17.06.2023 йилдан кучга кирди.
Лола Абдуазимова.
