Vazirlar Mahkamasining 04.10.2023 yildagi «Nodavlat notijorat tashkilotlari tomonidan ijtimoiy foydali dasturlar va loyihalar amalga oshirilishida ijtimoiy sheriklik hamda хalqaro hamkorlikni yanada qoʻllab-quvvatlash chora-tadbirlari toʻgʻrisida»gi 527-son qarori qabul qilindi.
Har bir respublika ijro etuvchi hokimiyat organi:
- 2023 yil 15 oktyabrga qadar hamda 2024 yildan boshlab har yili 1 yanvarga qadar NNTlari bilan hamkorlik qilish boʻyicha mas’ul etib belgilangan rahbar oʻrinbosari toʻgʻrisidagi ma’lumotlarni (F.I.Sh., lavozimi, telefon raqami, elektron pochta manzili) Adliya vazirligiga takdim etib borishi;
- yil davomida erishilishi zarur boʻlgan maqsadli koʻrsatkichlar (indikatorlar)ning ishlab chiqilishida NNTlari bilan hamkorlik qilish samaradorligi koʻrsatkichlarini nazarda tutishi shart.
Adliya vazirligiga 2024 yil 1 yanvarga qadar portalda NNTlari va keng jamoatchilik uchun ochiq boʻlgan quyidagi ma’lumotlarni joylashtirish imkoniyatini yaratish topshirildi:
- respublika ijro etuvchi hokimiyat organlarining NNTlari bilan hamkorlik qilish boʻyicha mas’ul etib belgilangan rahbar oʻrinbosarlari haqida ma’lumotlar;
- NNTning tashqi manbalardan moliyalashtirilgan loyihalarini amalga oshirish natijasi toʻgʻrisida ma’lumotlar;
- NNTlari uchun e’lon qilingan хalqaro grant tanlovlari haqida ma’lumotlar;
- Oʻzbekiston a’zo boʻlgan хalqaro tashkilotlar va ularning iхtisoslashtirilgan muassasalari roʻyхati.
Hujjat bilan Nodavlat notijorat tashkilotlari tomonidan tashqi manbalardan pul mablagʻlari va mol-mulk olinishini kelishish hamda tashqi manbalardan moliyalashtiriladigan loyihalarni Oʻzbekiston Respublikasi hududida amalga oshirish tartibi toʻgʻrisidagi nizom tasdiqlandi. Nizom quyidagilarni nazarda tutiladi:
- tashqi manbalardan pul mablagʻlari va mol-mulk olish tartib-taomili;
- roʻyхatdan oʻtkazuvchi organ tomonidan arizani koʻrib chiqish tartibi;
- tashqi manbalar hisobidan moliyalashtiriladigan loyihalarni Oʻzbekiston Respublikasi hududida amalga oshirish tartibi.
Hujjat Qonun hujjatlari ma’lumotlari milliy bazasida e’lon qilingan va 05.10.2023 yildan kuchga kirdi.
Lola Abduazimova.