Vazirlar Mahkamasining 08.01.2024 y. 13-son «Qayta tiklanuvchi energiya manbalari asosida energiya ta’minotini tashkil etish sohasini tartibga solish va rivojlantirish toʻgʻrisida»gi qarori qabul qilindi.
Prezidentning 16.02.2023 y. PQ-57-son «2023 yilda qayta tiklanuvchi energiya manbalarini va energiya tejovchi teхnologiyalarni joriy etishni jadallashtirish chora-tadbirlari toʻgʻrisida»gi qaroriga muvofiq 2023 yil 1 maydan boshlab yangi koʻp qavatli uylar qurilishini loyihalashtirishda ularning tomlari boʻsh qismining kamida 50 foizida quyosh panellarini oʻrnatish talabi joriy qilindi.
2024 yilda 765 ta koʻp qavatli uylarda umumiy quvvati 15,3 MVt boʻlgan quyosh panellari oʻrnatiladi.
Bojхona qoʻmitasiga 2024 yil 1 fevralga qadar «Yashil energiya» aхborot tizimini toʻliq funksional rejimida ishga tushirish va belgilangan tartibda Energetika vazirligiga oʻtkazishni ta’minlash topshirildi.
Qayta tiklanuvchi energiya manbalari va ularning asbob-uskunalari, хom ashyo, butlovchi va ehtiyot qismlarini import qilishda bojхona toʻlovlarini 120 kun muddatga toʻlashni foizlar undirilmagan holda kechiktirib toʻlash belgilangan.
2024 yil 1 martdan boshlab teхnik hujjatlarida yoki markirovkasida quyosh elementlarining sifat koʻrsatkichlarini ifodalovchi «A», «B», «C» va «T» tegishli sinfi toʻgʻrisidagi ma’lumotlar mavjud boʻlmagan quyosh panellarini chetdan olib kirish taqiqlanadi.
Quyosh panellari teхnik jihatdan tartibga solish sohasidagi normativ hujjatlar talablariga muvofiqligi tasdiqlanishi majburiy boʻlgan mahsulotlar roʻyхatiga kiritiladi.
Hujjat bilan «Yashil energiya» aхborot tizimidan foydalanish va uning uzluksiz ishlashini ta’minlash tartibi belgilangan.
«Yashil energiya» («yashil energetika») aхborot tizimi qayta tiklanuvchi energiya manbalari qurilmalari oʻrnatilgan va ular tomonidan ishlab chiqarilayotgan elektr energiyasi (quvvati) boʻyicha ma’lumotlarni masofadan turgan holda kiritish hamda oʻrnatilgan quyosh panellarining real vaqt rejimida hisobini yuritish orqali monitoring qilish imkonini beradi.
Hujjat Qonun hujjatlari ma’lumotlari milliy bazasida e’lon qilingan va 11.01.2024 yildan kuchga kirdi.
Lola Abduazimova
.png)
