Президентнинг 22.08.2022 йилдаги «2022-2023 йилларда ахборот-коммуникация технологиялари соҳасини янги босқичга олиб чиқиш чора-тадбирлари тўғрисида»ги ПҚ-357-сон қарори қабул қилинди.
Ҳужжат билан қуйидагилар ахборот-коммуникация технологиялари соҳасини 2022-2023 йилларда янада ривожлантиришнинг асосий вазифалари этиб белгиланди, хусусан 2022 йил якунига қадар:
- аҳоли яшаш масканларини кенг полосали мобиль алоқа тармоғи билан қамраб олиш даражаси 98%га, халқаро аҳамиятга эга автомобиль йўллари бўйлаб юқори тезликдаги мобиль интернет қамрови 60%га етказилади;
- 40 минг км оптик толали алоқа линияларини қуриш орқали оптик толали алоқа қамрови 80%га етказилади;
- электрон давлат хизматлари кўрсатилишига хусусий секторни жалб қилиш орқали фойдаланувчилар сони 2 баравар оширилади.
2023 йил якунига қадар:
- йилига 6,5 минг нафардан ортиқ ёшларнинг ахборот технологиялари йўналишида таълим олиши йўлга қўйилади;
- давлат органлари, шу жумладан маҳаллий ҳокимлик органларида ҳамда иқтисодиётнинг реал сектори тармоқларидаги корхоналарда 214 та ахборот тизими ва дастурий маҳсулотлар жорий этилади.
2022 йил 1 сентябрдан бошлаб республиканинг барча ҳудудларида ахборот-коммуникация технологияларини қўллаш орқали масофавий хизматларни экспорт қилиш марказлари босқичма-босқич ташкил этилади.
2023 йил 1 январдан бошлаб давлат органларининг расмий веб-сайтлари ва порталларини «Ягона дарча» тамойили асосида ўз ичига олувчи Ўзбекистон Ҳукумати портали ягона платформаси ишга туширилади.
Қарор билан қуйидагилар тасдиқланди:
- 2022-2023 йиллар учун ахборот-коммуникация технологиялари соҳасини янада такомиллаштириш бўйича «йўл харитаси»;
- 2022-2023 йиллар учун давлат бошқарувини рақамлаштириш бўйича устувор лойиҳалар рўйхати;
- 2022-2023 йиллар учун иқтисодиётнинг реал сектори тармоқларини рақамлаштириш бўйича устувор лойиҳалар рўйхати;
- 2022-2023 йиллар учун айрим давлат ва хўжалик бошқаруви органларини идоравий рақамли трансформация қилиш жараёнларини комплекс жадаллаштириш бўйича «йўл хариталари»;
- 2022-2023 йиллар учун ҳудудларни рақамли трансформация қилиш бўйича устувор лойиҳалар рўйхати.
Ҳужжат Қонун ҳужжатлари маълумотлари миллий базасида эълон қилинган ва 23.08.2022 йилдан кучга кирди.
Лола Абдуазимова.
.png)
