Вазирлар Маҳкамасининг 17.02.2021 йилдаги «Tashkent Pharma Park» инновацион илмий-ишлаб чиқариш фармацевтика кластерининг фаолиятини ташкил этиш ва молиялаштириш чора-тадбирлари тўғрисида»ги 78-сон қарори қабул қилинди.
Ҳужжатда Президентнинг 28.01.2020 йилдаги «Tashkent Pharma Park» инновацион илмий-ишлаб чиқариш фармацевтика кластерини ташкил этиш тўғрисида»ги ПҚ-4574-сон қарорига мувофиқ Фармацевтика техник университети ҳамда инновацион дори воситалари, тиббий буюмлар ва тиббий техникалар ишлаб чиқаришга мўлжалланган ишлаб чиқариш майдонларидан иборат саноат зонаси ташкил этиш белгиланган.
Қуйидагилар Кластер фаолиятининг асосий вазифалари этиб белгиланган:
- инновацион ечимларни жорий этиш орқали фармацевтика тармоғини ривожлантириш;
- ихтисослаштирилган таълим инфратузилмасини яратиш;
- инвестициялар ва илғор технологияларни жалб қилиш;
- дори воситалари, тиббий буюмлар ва тиббий техникани халқаро стандартларга мувофиқ ишлаб чиқариш;
- хорижий мамлакатларнинг етакчи таълим муассасалари, илмий-тадқиқот марказлари билан алоқаларни ривожлантириш.
Тошкент вилоятининг Қибрай туманида кластер Дирекцияси ташкил этилади. Ҳужжат билан давлат муассасасининг тузилмаси, ходимлари сони тасдиқланган.
Дирекция лойиҳанинг ижро этувчи органи, шунингдек қурилаётган объектлар бўйича асбоб-ускуналар, товарлар, ишлар ва хизматларни қабул қилиб олиш учун масъул ҳисобланади.
Президентнинг 28.04.2020 йилдаги «Tashkent Pharma Park» инновацион илмий-ишлаб чиқариш фармацевтика кластерини ташкил этишни молиялаштиришга доир биринчи навбатдаги чора-тадбирлар тўғрисида»ги ПҚ-4698-сон қарорига мувофиқ кластерни ташкил этиш лойиҳасини молиялаштириш учун Тикланиш ва тараққиёт жамғармаси томонидан 50 млн долларгача суммада маблағлар ажратилиши назарда тутилган.
Ҳужжат Қонун ҳужжатлари маълумотлари миллий базасида эълон қилинган ва 18.02.2021 йилдан кучга кирди.
Лола Абдуазимова.
