Pandemiya tufayli qarz oluvchilarning kreditlari boʻyicha toʻlovlar bilan bogʻliq хatarlarni yengillashtirish uchun Markaziy bank kredit tashkilotlariga tavsiyalarni e’lon qildi.
Ular quyidagilardan iborat:
- joriy qilingan karantin rejimi faoliyatiga salbiy ta’sir koʻrsatgan qarzdor – jismoniy shaхslar va yakka tartibdagi tadbirkorlarning murojaatlariga asosan, 2020 yil 1 oktyabrga qadar kredit toʻlovlarini qaytarishda imtiyozli davr berish va mos ravishda yakuniy toʻlovlar muddatlarini uzaytirish;
- muddati oʻtgan qarzdorliklarni kechiktirilishida jarima sanksiyalarini qoʻllamaslik hamda undiruvni kredit ta’minotiga qaratmaslik.
Kredit tashkilotlariga yuqoridagi tavsiyalarga asosan shartlari qayta koʻrib chiqilgan kreditlar sifatining tasnifini oʻzgartirmaslik huquqi berildi. Shuningdek, ularga qisqa muddat ichida kredit toʻlovlarini kechiktirish masalalari boʻyicha murojaatlarni masofaviy tarzda koʻrib chiqish tizimini yaratish choralarini koʻrish tavsiya etiladi.
Taqdim etilayotgan imtiyozlardan insof bilan foydalanish maqsadida mijozlarga faqat ularning moliyaviy ahvoli uzoq vaqt yomonlashgan taqdirdagina kredit tashkilotlariga murojaat qilishlari tavsiya qilinadi.
