2021 yil 21 iyun kuni Oʻzbekiston Respublikasi Oliy Majlisi Senati Kengashining majlisi boʻlib oʻtdi. Majlisda Senatning oʻn oltinchi yalpi majlisini 2021 yil 25 iyun kuni chaqirish toʻgʻrisida qaror qabul qilindi.
Videokonferensaloqa tarzida oʻtkaziladigan yalpi majlisda quyidagi qonunlarning muhokama qilinishi rejalashtirilgan:
- “Rasmiy statistika toʻgʻrisida”gi;
- “Vijdon erkinligi va diniy tashkilotlar toʻgʻrisida”gi;
- “Sudlar toʻgʻrisida”gi;
- “Oʻzbekiston Respublikasining davlat tili toʻgʻrisida”gi;
- “2021 yil uchun Oʻzbekiston Respublikasining Davlat byudjeti toʻgʻrisida”gi;
- “Jinoiy faoliyatdan olingan daromadlarni legallashtirishga qarshi kurashish tartibi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi.
Shuningdek, kun tartibida Oliy Majlis Senatining davlat organlarida ochiqlik va oshkoralikni ta’minlash sohasidagi faoliyatini takomillashtirish, Oliy Majlis Senatining Aхborot siyosati va davlat organlarida ochiqlikni ta’minlash masalalari qoʻmitasini tashkil etish toʻgʻrisidagi masalalar va boshqalar.
Shu bilan birga, Toshkent viloyatining Oqqoʻrgʻon, Ohangaron, Bekobod, Boʻstonliq, Boʻka, Zangiota, Yuqori Chirchiq, Qibray, Parkent, Piskent, Oʻrta Chirchiq, Yangiyoʻl tumanlari va Olmaliq, Chirchiq, Angren, Yangiyoʻl, Bekobod shaharlari chegaralarini oʻzgartirish toʻgʻrisidagi masala koʻrib chiqilishi rejalashtirilgan.
