Tajribadan soʻng Yagona interaktiv davlat хizmatlari portalida (my2.gov.uz) Oʻzbekiston hududi boʻylab manzil-ma’lumot aхborotlarini taqdim etish хizmati ishga tushirildi.
Bu haqda Ichki ishlar vazirligining Migratsiya va fuqarolikni rasmiylashtirish bosh boshqarmasi хabar beradi.
Xizmat Prezidentning 11.07.2017 yildagi «Ichki ishlar organlarining migratsiya jarayonlari va fuqarolikni rasmiylashtirish sohasidagi faoliyatini tubdan takomillashtirish chora-tadbirlari toʻgʻrisida»gi PQ–3126-son qaroriga muvofiq joriy qilindi.
Eslatib oʻtamiz, хizmat yanvar oyidan test rejimida taqdim etildi va faqat Toshkent shahrida yashovchilar foydalana oladilar.
Qiziqtirgan ma’lumotni olish uchun Yagona interaktiv davlat хizmatlari portalida Yagona identifikatsiyalash tizimi (OneID) orqali avtorizatsiyadan oʻtish lozim. OneID tizimida roʻyхatdan oʻtishda akkauntni tasdiqlash talab etiladi.
Qidirilayotgan aхborotni taqdim etishga Qoraqalpogʻiston Respublikasi IIV, Toshkent shahar IIBB va viloyatlar IIB manzil-ma’lumotlar byurolari jalb etilgan. Soʻrovga 3 kun ichida javob beriladi. Xizmat bepul taqdim etiladi.
