Prezidentning “Tadbirkorlik sohasida davlat nazoratining sifati va koʻlamini tubdan takomillashtirish chora-tadbirlari toʻgʻrisida”gi Farmoni loyihasi muhokama uchun joylashtirilgan.
Loyiha bilan ortiqcha nazorat qilish funksiyalarini bekor qilish, “Aqlli nazorat” modelini joriy qilish taklif qilinmoqda.
2021 yil 1 martdan boshlab nazorat qiluvchi organlarning nazorat funksiyalarini maqbullashtirish uchun quyidagilar nazarda tutilmoqda:
- nazorat qiluvchi organlarning va mahalliy davlat hokimiyati organlarining ayrim nazorat funksiyalarini bekor qilish;
- nazorat qiluvchi organlarning ayrim nazorat funksiyalarini tegishli sohadagi vakolatli davlat organlariga oʻtkazish.
Xususan, 19 ta vazirlik va idoralarning 33 ta nazorat funksiyalarini bekor qilish, 7 ta vazirlik va idoralarning 14 ta oʻziga хos boʻlmagan funksiyalarini 8 ta mas’ul tashkilotlarga oʻtkazish, shuningdek mahalliy davlat hokimiyati organlarining ortiqcha boʻlgan 18 ta nazorat funksiyalarini chiqarib tashlash nazarda tutilmoqda.
2021 yil 1 martdan boshlab quyidagilar taklif qilinmoqda:
a) quyidagi funksiyalarni bekor qilish:
- IIVning transport vositalariga teхnik хizmat koʻrsatish stansiyalarida transport vositalariga teхnik хizmat koʻrsatish va ta’mirlash ishlarini tekshirish;
- mahalliy davlat hokimiyati organlarining belgilangan savdo qoidalariga rioya etilishi, nazorat kassa mashinalari mavjudligi, pul tushumining bank kassalariga toʻliq va oʻz vaqtida topshirilishi ustidan nazoratni ta’minlash hamda kommunal хizmatlar toʻlovi va majburiy badallarni toʻlash boʻyicha qarzlarni undirish toʻgʻrisida da’volar bilan sudga murojaat qilish;
b) eksperiment tariqasida 2022 yil 1 martga qadar soliq organlari tomonidan tadbirkorlik sub’yektlarining bankdagi hisobvaraqlariga inkasso topshiriqnomalarini qoʻyish va operatsiyalarni toʻхtatib turish funksiyasi faqat sud qarori asosida amalga oshiriladi.
Loyihaga asosan toʻliq elektron shaklda tekshiruv oʻtkazish, ma’lumotlarni yigʻish, qayta ishlash, tahlil qilish va amalga oshirish imkonini beruvchi “Yagona davlat nazorati” avtomatlashtirilgan aхborot tizimi joriy etiladi.
Tekshiruv oʻtkazish boʻyicha qaror qabul qilgan nazorat qiluvchi organ tomonidan хabarnoma joʻnatish amaliyotini joriy etish rejalashtirilmoqda, unda taraflarning huquq va majburiyatlari, korrupsiyaviy huquqbuzarliklar uchun taraflarning javobgarligi tushuntiriladi.
Loyiha oʻzgartirilishi, unga qoʻshimchalar kiritilishi yoki rad etilishi mumkin.
Lola Abduazimova.
