AJ boshqaruvi tuzilmasida qoʻmitalar paydo boʻladi

Taklif etilayotgan yangi normalardan biri – shoʻ’ba va tobe хoʻjalik jamiyatlari tomonidan oʻzlarining asosiy jamiyatlari ustav kapitalidan ulush olishga taqiq qoʻyilishi. Bu haqda batafsil bu yerda yozgan edik.     

AJda boshqaruv qoʻmitalari tuziladi

Aksiyadorlik jamiyati boshqaruvi maqomini tartibga soluvchi normaning ancha aniq tahriri taklif etilmoqda. Xususan, eng muhim masalalarni koʻrib chiqish va tavsiyalarni ishlab chiqish uchun jamiyatda uning a’zolari, jamiyat хodimlari va (yoki) jalb qilingan shaхslardan iborat boshqaruv qoʻmitalari tuzilishi mumkin. Majburiy tartibda faqat boshqaruv a’zolaridan iborat audit qoʻmitasini tuzish koʻzda tutilmoqda.

Jamiyat boshqaruvi qoʻmitalarini shakllantirish va ish tartibi, ularning soni va miqdoriy tarkibi kuzatuv kengashi tomonidan tasdiqlanadigan ichki hujjat boʻyicha belgilanadi.

Aybdorlar boy berilgan foydani qoplashadi

Shuningdek, jamiyatning kuzatuv kengashi a’zolari, direktori yoki boshqaruvi a’zolari, ishonchli boshqaruvchining javobgarligi chegaralarini kengaytirish masalasi ham oʻrtaga tashlangan. Ularga boy berilgan foydani, ya’ni jamiyatga zarar keltirilishiga sabab boʻlgan bitimlar tuzilganligi haqida qaror qabul qilinishi natijasida olingan daromadni qoplash majburiyati yuklanadi.

Tegishli da’vo arizasi bilan sudga jamiyatning oʻzi yoki joylashtirilgan aksiyalarning kamida 1%iga egalik qiluvchi aksiyador (aksiyadorlar) murojaat etishi mumkin.

Toʻliq foydalanish – sud qaroriga binoan

Bugungi kunda aksiyadorlarga Qonunning 103-moddasida keltirilgan hujjatlardan foydalanish imkoniyati berilgan, ammo istisno holatlar ham mavjud. Bular buхgalteriya hisobi hujjatlari, boshqaruv majlislari bayonnomalari, shuningdek, jamiyat direktorining (boshqaruvi raisining) buyruqlari hamda jamiyat aksiyadorlari reyestri. Loyihada sud qaroriga binoan aksiyadorga ular bilan tanishish imkoniyatini berishni koʻzda tutish taklif etilgan.

Loyihada, shuningdek, boshqa oʻzgartirishlar saqlanadi.

Loyiha muhokama bosqichida boʻlib, oʻzgartirilishi, qoʻshimchalar kiritilishi yoki rad etilishi mumkin.    

Oleg ZAMANOV,

ekspertimiz.