Davlat aktivlarini boshqarish agentligi direktorining «Oʻzbekiston Respublikasining Yagona milliy baholash standartini tasdiqlash toʻgʻrisida»gi buyruq loyihasi muhokamaga qoʻyildi.
Hujjat bilan Oʻzbekiston Respublikasining Yagona milliy baholash standartini (keyingi oʻrinlarda – YaMBS) tasdiqlash nazarda tutilmoqda.
Ma’lumot uchun: YaMBS baholash faoliyatini normativ jihatdan tartibga solinishini hamda baholash tartibi va baholash ekspertizasiga qoʻyiladigan talabalarni belgilaydi.
YaMBS amaldagi tahrirdagi standartdan farqli ravishda:
- хalqaro baholash standartlari normalariga muvofiqlashtirilgan;
- tizimlashtirilgan;
- baholash toʻgʻrisidagi hisobotning ishonchliligini ekspertizadan oʻtkazish boʻyicha standartni aks ettirgan;
- baholash toʻgʻrisidagi hisobotlardan foydalanish muddatini belgilaydi;
- transport vositalari qiymatini baholash boʻyicha alohida standartni aks ettirgan;
- qurilish, rekonstruksiya yoki ta’mirlash jarayonida (development) boʻlgan binolarning qiymatini baholash standartini aks ettirgan;
- nomoliyaviy majburiyatlarni (kafolatlar, qoplamalar, majburiyatlar va h.k.) qiymatini baholash tartibini aks ettirgan;
- davlat tili va rus tillarida ishlab chiqilgan.
Loyiha oʻzgartirilishi, toʻldirilishi yoki rad etilishi mumkin.
Sobir Nurberdiyev.
