Вазирлар Маҳкамасининг 29.04.2023 йилдаги “Ўзбекистон Республикаси Фавқулодда вазиятларнинг олдини олиш ва бундай вазиятларда ҳаракат қилиш давлат тизими фаолиятини самарали ташкил этиш чора-тадбирлари тўғрисида”ги 171-сон Қарори қабул қилинди.
Ҳужжат билан Фавқулодда вазиятларнинг олдини олиш ва бундай вазиятларда ҳаракат қилиш давлат тизими тўғрисидаги (ФВДТ) низом тасдиқланмоқда.
ФВДТ қуйидаги режимларда амалга оширилади:
- кундалик режим – муайян ҳудудда, объектда фавқулодда вазиятлар рўй бериши хавфи мавжуд бўлмаганда;
- юқори тайёргарлик режими – фавқулодда вазиятлар рўй бериши хавфи мавжуд бўлганда;
- фавқулодда вазият режими – фавқулодда вазиятлар рўй берганда ва фавқулодда вазиятлар даврида.
Юқори тайёргарлик ва фавқулодда вазият режимлари:
- Вазирлар Маҳкамасининг;
- Қорақалпоғистон Вазирлар Кенгашининг;
- вилоятлар, Тошкент шаҳри, туман ва шаҳар хокимларининг;
- тегишли объектлар раҳбарларининг қарорлари билан жорий этилиши мумкин.
Низом билан шунингдек ФВДТ бошқарув органлари, ҳар бир режимда амалга ошириладиган тадбирлар рўйхати, шунингдек уларни молиялаштириш манбалари белгиланган.
Ҳужжат Қонунчилик маълумотлари миллий базасида эълон қилинган ва 01.05.2023 йилдан кучга кирди.
Собир Нурбердиев.
