Президентнинг 26.04.2022 йилдаги “Республикада гўшт, жун ва сут йўналишидаги майда шохли молларни кўпайтириш ва тармоқ озуқа базасини мустаҳкамлашга қаратилган қўшимча чора-тадбирлар тўғрисида”ги ПҚ-224-сон қарори қабул қилинди.
Республикада қўй ва эчкичиликни янада ривожлантириш, тармоқ озуқа базасини кўпайтириш, ушбу йўналишдаги тадбиркорлик субъектларини қўллаб-қувватлаш мақсадида қуйидагилар тасдиқланди:
- 2022 - 2023 йилларда республика ҳудудига олиб кириладиган қўй ва эчкилар сони бўйича прогноз параметрлар;
- 2022 - 2023 йилларда майда шохли моллар учун озуқа ишлаб чиқариш қувватларини ишга тушириш бўйича прогноз параметрлар;
- 2022 - 2023 йилларда ҳудудларда гўшт, жун ва сутни қайта ишлаш ҳамда тайёр маҳсулотлар ишлаб чиқаришни ташкил этиш бўйича прогноз параметрлар.
Мазкур маблағлар тижорат банклари томонидан Марказий банкнинг асосий ставкасига 4 фоизлик банк маржасини қўшиш орқали ҳисобланадиган ставка бўйича кредитлар ажратилишини назарда тутадиган маблағларни ўзлаштириш тартиби белгиланди.
Қуйидаги кредитларни ажратиш назарда тутилган:
- тадбиркорлик субъектларига хориждан гўшт, жун ва сут йўналишидаги қўй ва эчкилар харид қилиш учун - 5 йил муддатгача, шу жумладан 3 йиллик имтиёзли давр билан;
- тадбиркорлик субъектларига уларнинг озуқа цехлари (гранулятор)ни, гўшт, жун ва сут маҳсулотларини қайта ишлашни ташкил этиш бўйича лойиҳаларини молиялаштириш учун - 10 йил муддатгача, шу жумладан 3 йиллик имтиёзли давр билан;
- хўжалик юритувчи субъектларга яйловларда чорва молларининг сувга бўлган эҳтиёжини қондириш учун сув чиқариш (қудуқлар бурғилаш ёки мукаммал таъмирлаш) ва сув иншоотига ресурс тежамкор ускуналар ўрнатиш учун - 5 йил муддатгача, шу жумладан 3 йиллик имтиёзли давр билан.
Молия вазирлиги республика бюджетининг қўшимча маблағлари ҳисобидан 2022 йил 15 майга қадар 200 млрд сўм миқдоридаги кредит ресурсларини 3 йиллик имтиёзли давр билан 7 йил муддатга тижорат банкларига 10% ставкада ажратади.
Бунда, мазкур маблағлар тижорат банклари томонидан жисмоний шахсларга қўй ва эчки харид қилиш учун Президентнинг 2021 йил 20 декабрдаги "Оилавий тадбиркорликни ривожлантириш ва аҳолининг даромад манбаини кенгайтиришга доир қўшимча чора-тадбирлар тўғрисида"ги ПҚ-55-сон қарорида белгиланган тартиб бўйича кредит сифатида ажратилади.
Бундан ташқари, ипак қурти уруғи, тут кўчатлари ва пилла етиштириш, пиллани қайта ишлаш ва тайёр маҳсулотлар ишлаб чиқариш ҳамда қоракўлчилик билан шуғулланаётган субъектлар, қоракўлчилик маҳсулотларини қайта ишлаш корхоналари ва қоракўлчилик маҳсулотлари ишлаб чиқарувчилар учун кўзда тутилган солиқ ва божхона тўловлари бўйича имтиёзлар 2023 йил 1 январдан 2026 йил 1 январга қадар узайтирилади.
Ҳужжат Қонун ҳужжатлари маълумотлари миллий базасида эълон қилинган ва 27.04.2022 йилдан кучга кирди.
Лола Абдуазимова.
